miércoles, 30 de abril de 2025
A Xunta de Galicia vén de impulsar a renovación do Plan de Xestión da Ribeira Sacra de cara a establecer os vindeiros pasos a dar a candidatura Paisaxe da auga: Ribeira Sacra, seleccionada polo Consello do Patrimonio Histórico como a proposta oficial de España para ser declarada patrimonio mundial pola Unesco en 2026. Así o anunciou a directora xeral de Patrimonio Cultural, Mª del Carmen Martínez, tras a reunión, esta mañá, da Comisión Interdepartamental da Ribeira Sacra que coordina as accións deste plan dun xeito integral.
A directora xeral de Patrimonio salientou a importancia do Plan para esta candidatura mundial, xa que ten por obxecto garantir a axeitada xestión da paisaxe cultural da auga da Ribeira Sacra. Con este fin, segundo apuntou, téñenselle artellados programas, nos que participan diferentes departamentos da Xunta de Galicia, que inclúen diferentes accións de vital importancia para a ordenación, desenvolvemento e protección do territorio, a paisaxe e o seu patrimonio cultural co obxecto de alcanzar de forma transversal os obxectivos estratéxicos propostos, argumentou.
A representante da Consellería de Cultura, Lingua e Xuventude lembrou que, tras a aprobación do Consello de Patrimonio Histórico, a candidatura da Ribeira Sacra está xa nunha nova fase, na que é preciso seguir traballando como ata agora, defendeu sobre os seguintes pasos a dar. Neste senso, fixo fincapé en que o obxectivo é lograr a inclusión na Lista de Patrimonio da Humanidade, debido a que a proposta será abordada en 2026 no Comité do Patrimonio Mundial da Unesco.
Vindeiros pasos ata o Comité do Patrimonio Mundial da Unesco
Mª del Carmen Martínez enmarcou a reunión hoxe da Comisión Interdepartamental da Ribeira Sacra nesta nova etapa na que traballa o Goberno galego. Ao respecto, adiantou que, ao longo do ano, o equipo técnico redactor, en colaboración co Ministerio de Cultura, deberán completar o expediente desde o punto de vista formal co fin de cumprir coas directrices operativas da Unesco.
Posteriormente, a documentación será presentada no Centro de Patrimonio Mundial da Unesco de París en setembro deste ano, á que se lle engadirá unha nova entrega cos avance nestes informes en febreiro de 2025. Trátase de que toda a documentación sexa avaliada polos órganos consultivos antes da súa valoración no Consello do Patrimonio Histórico, que ten prevista a súa sesión para o segundo semestre do ano 2026.
O conselleiro do Mar, Alfonso Villares, defendeu unha reforma da Política Pesqueira Común (PPC) para que esta se adapte ás necesidades da cadea mar-industria galega. Esta reforma debe incluír unha rexionalización da normativa europea e, por tanto, ter en conta as propostas e participación proactiva das autoridades rexionais na futura toma de decisións que se leven a cabo en Bruxelas neste senso. Así o expuxo este martes na reunión mantida ao máis alto nivel polo Comisario de Pesca e Océanos, Costas Kadis, co ministro de Agricultura, Pesca e Alimentación, Luis Planas, os responsables das comunidades autónomas do ramo, e as entidades representantes do sector pesqueiro, acuícola e das mulleres.
O presidente da Xunta, Alfonso Rueda, informou de que o Executivo autonómico aprobou hoxe 'solicitar formalmente un informe ao Consello Consultivo de Galicia' sobre 'as posibilidades legais' do traspaso das competencias para xestionar os permisos de traballo das persoas doutros países. O obxectivo é avaliar a posibilidade de asumir esta función en tres áreas concretas: as autorizacións iniciais para que unha persoa estranxeira poida traballar na comunidade, os permisos para traballos de tempada e os de larga estancia por motivos de estudos ou formación.
