miércoles, 23 de septiembre de 2026
A conselleira de Medio Ambiente e Cambio Climático, Ángeles Vázquez, salientou hoxe que as 140 bandeiras azuis que este ano reciben 114 praias, 11 portos deportivos e 15 centros azuis consolidan Galicia como exemplo do coidado ambiental dos recursos naturais do litoral.
Durante o acto de entrega destes distintivos de carácter internacional que concede a Asociación de educación ambiental e do consumidor (Adeac), a conselleira puxo en valor que Galicia concentra case unha de cada cinco bandeiras concedidas en España (638) e consolida a súa posición entre as tres comunidades que reciben un maior número de distintivos para as súas praias, xunto con Valencia (que suma 138) e Andalucía (130).
A maiores, explicou que, tendo en conta as 49 bandeiras entregadas a sendeiros azuis o pasado mes de marzo, Galicia atesoura un total 189 insignias azuis, balance co que mellora a súa posición a nivel nacional ao superar por primeira vez a Andalucía (con 188) e situarse como a segunda comunidade española con máis distintivos azuis en todas as categorías.
Nesa liña, Ángeles Vázquez incidiu en que estes recoñecementos poñen en valor a costa, o patrimonio natural e a imaxe turística da Comunidade como destino sustentable e de calidade.
Cómpre lembrar que a concesión dunha bandeira azul a unha praia ou a un porto deportivo responde a criterios de calidade das augas -que debe ser excelente-, seguridade e accesibilidade, dotación de servizos e xestión ambiental e sustentabilidade.
E, no caso dos centros azuis, que, como subliñou a conselleira, este ano lucirán por primeira vez este distintivo como tal, deben fomentar a educación ambiental no litoral, o coñecemento da contorna e as alternativas de ocio. Cómpre lembrar que esta categoría engloba ás aulas de natureza, centros de recepción de visitantes e instalacións similares dedicadas á formación ambiental.
Para concluír, Ángeles Vázquez incidiu en que estes galardóns son de especial transcendencia para mellorar a calidade das augas, o estado das nosas praias e os servizos que ofrecemos nelas así como para incentivar o turismo sostible e responsable na nosa Comunidade. Nese senso, subliñou que precisamente os nosos recursos naturais e paisaxísticos son algunhas das principais motivacións para visitar Galicia.
Bandeiras por provincias e concellos
Máis polo miúdo, por provincias, Pontevedra concentra o maior número de bandeiras azuis de Galicia, concretamente 60 que recaen noutras tantas praias e outras 6 en instalacións portuarias. No caso da Coruña, os galardoados foron 38 areais e 4 portos e no de Lugo, recoñeceuse con este distintivo a 16 praias e 1 porto deportivo.
Sanxenxo volve repetir como o municipio español con máis areais galardoados, un total de 17, os mesmos que logrou en 2023. O concello pontevedrés suma tamén 3 distincións para outros tantos portos e terá de novo 1 centro azul. Ademais, cómpre subliñar o caso de Vigo, que con 12 praias con bandeira é a cidade galega que recibe máis galardóns.
Así mesmo, no caso da provincia da Coruña, Arteixo volve ser o que concentra un maior número de bandeiras, con 7 areais seleccionados; seguido da Coruña 5 areais e 1 porto, Oleiros 5 praias e 2 centros azuis e Ferrol con 5 areais tamén.
Por último, Foz é o concello lucense con máis praias galardoadas, un total de 5; seguido de Burela, con 2 praias e 2 centros azuis; Barreiros e O Vicedo, que suman 2 areais cada un deles, e Ribadeo, tamén con 2 praias e que un ano máis conta cun porto galardoado.
O Consello da Xunta analizou na súa reunión de hoxe un informe da Consellería do Medio Rural sobre o anteproxecto de Lei de loita contra os incendios forestais de Galicia (LLCIF), antes da súa remisión para consulta ao Consello Forestal de Galicia, cuxa reunión está prevista para mañá martes. A futura normativa prioriza reforzar a protección da poboación e a xestión integral do territorio. O presidente do Goberno autonómico, Alfonso Rueda, lembrou que actual lexislación sobre incendios forestais 'ten case 20 anos' e 'cómpre actualizarla e adaptala aos novos tipos de lumes así como aos avances que houbo tanto na loita como na prevención de incendios'.
Galicia é a rexión que máis solicitudes presentou en Europa para participar en proxectos interrexionais de I+D+i. Así o indican os datos da Vanguard Initiative, alianza europea da que a nosa Comunidade forma parte, xunto a outras rexións, para estimular o crecemento europeo da I+D+i a través da colaboración entre territorios de distintos países e a especialización intelixente. Precisamente a Xunta vén de publicar a convocatoria VInnovate Galicia, unha liña de axudas para organismos de investigación e empresas que presenten proxectos con outras rexións. Para poder candidatar á convocatoria VInnovate Galicia da Xunta, cuxo prazo de presentación de propostas está aberto desde hoxe ata o 19 de outubro, os posibles participantes teñen que presentarse antes á fase europea.
