viernes, 14 de agosto de 2026
O cantante Rod Stewart vén de incorporarse ao cartel de O Gozo Festival 2024 co concerto que realizará o vindeiro 15 de decembro no Coliseum da Coruña. Así o anunciou hoxe o director de Turismo de Galicia, Xosé Merelles, durante a presentación da nova oferta musical desta iniciativa que conta co apoio da Xunta de Galicia.
Xunto ao director de Turismo de Galicia, tamén participou na presentación o director de Sweet Nocturna, David Lago. Como explicaron, o artista, con máis de 250 millóns de discos e singles vendidos na súa carreira musical, chegará a Galicia da man deste festival que, ademais, ten programadas distintas opcións durante este ano en diferentes cidades galegas a cargo de reputados artistas internacionais.
Xosé Merelles indicou que, nesta segunda edición do festival, esperamos que se poda repetir e incluso mellorar o excelente resultado do ano pasado cando se rexistraron máis de 40.000 asistentes en catro cidades entre marzo e novembro e se venderon entradas en 17 países. Recordou que se trata dunha aposta da Xunta de Galicia por apoiar os grandes festivais que son quen de dinamizar turisticamente o destino a través da música e xerar tamén un importante retorno económico nas distintas cidades nas que se desenvolven, engadiu. Tamén recordou que terán, por iso, tamén un importante peso na futura Estratexia de Turismo de Galicia 2024-2030 na que se está a traballar.
Neste sentido, salientou a importancia de que O Gozo Festival diversifique a oferta en distintas cidades diversificando así tamén o noso turismo e que, con concertos como o anunciado hoxe que se celebrará en decembro contribúe tamén a desestacionalizar o noso destino. Este ano están xa programadas sete datas en distintas cidades con máis de 20 artistas confirmados como Queens of Stone, que actuará o vindeiro 18 de xuño na Coruña, ou Maná o 27 de xuño na mesma cidade. O vindeiro 6 de xullo será a quenda de Ed Sheeran no Monte do Gozo, acompañado, entre outros de Bomba Estéreo ou Fillas de Casandra. Tamén está programada unha xornada de música electrónica no mesmo escenario ou o concerto de Loreena McKennit no Auditorio Mar de Vigo.
Nestes momentos hai máis de 52.000 entradas vendidas para o inicio da programación con público confirmado de Uruguay, Finlandia, México, Arxentina, Irlanda ou Xapón.
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
