domingo, 27 de julio de 2025
A Mostra Internacional de Teatro (MIT) de Ribadavia celebra este ano o seu 40º aniversario coa que será a edición máis plural, inclusiva e festiva da súa historia. Así se puxo de manifesto hoxe na presentación en Santiago de Compostela da programación que se desenvolverá do 19 ao 27 de xullo e para a que o Concello ribadaviense volve contar coa colaboración económica da Xunta no marco da súa estratexia de apoio ás mostras de referencia para as artes escénicas de Galicia.
O director da Axencia Galega das Industrias Culturais, Jacobo Sutil, interveu no acto organizado no Salón Teatro, sede do Centro Dramático Galego (CDG), que tamén este ano conmemora as catro décadas da súa fundación como a principal institución escénica da Comunidade. O representante da Consellería de Cultura, Lingua e Xuventude avanzou que este periplo en paralelo traballando polo teatro do país será celebrado conxuntamente coa presenza da compañía pública na carteleira da Mostra de Ribadavia, onde o 26 de xullo estreará Nada se sabe, coprodución con Culturactiva que forma parte da ampla programación do 40º aniversario do CDG.
Coprodución inaugural
Sutil anunciou, así mesmo, que o espectáculo inaugural desta edición será outra coprodución promovida pola Xunta de Galicia, neste caso a través do Centro Coreográfico Galego. Trátase de Dique, de Nova Galega de Danza con dirección de Marta Pazos, que precisamente terá a súa estrea absoluta o vindeiro 21 de xuño no Salón Teatro.
Participaron tamén na presentación desta 40ª edición da Mostra Internacional de Teatro o alcalde de Ribadavia, César Fernández; o director artístico do festival, Roberto Pascual, e o director do Centro Dramático Galego, Fran Núñez, quen ofreceu máis detalles do espectáculo Nada se sabe.
Traballo a prol da inclusión
Nesta proposta, que afonda na liña de traballo inclusivo desenvolvida polo Centro Dramático Galego, dúas actrices e dous actores con diversidade funcional repasan diversas versións da discapacidade no teatro clásico, deténdose nunha adaptación moderna e sinxela de Filoctetes, unha das traxedias gregas de Sófocles, asinada por Manuel Lourenzo. Ignacio García, quen fora director do Festival de Teatro Clásico de Almagro, e Fran Rei dirixen esta peza a modo de creación colectiva, para a que contan tamén coas achegas de Francisco Sánchez e do elenco integrado por Carme García Rigau, Rubén Bargiela Sierpes, Corina Alfonso Maña e Elvis García Torres.
Durante os seus nove días de celebración, a Mostra Internacional de Teatro de Ribadavia recibirá outras recoñecidas figuras da creación e dirección escénica, como Guillermo Calderón, Alice Ripoll, Alberto Conejero ou Esther Carrodeguas como parte dunha carteleira na que tamén figuran grande nomes do clown, como o arxentino Gabriel Chamé e a inglesa Peta Lily, así como as estreas en Galicia dos novos traballos de Alberto Velasco ou Los Galindos.
Documentais, coloquios, cursos e presentacións complementan a intensa programación de espectáculos, para a que xa están á venda os bonos en ataquilla.com. Poderán adquirirse por esta vía ata o 24 de xuño, data a partir da que as entradas restantes estarán dispoñibles tanto na oficina da mostra como na súa web.
A comunidade galega vén de alcanzar varios fitos históricos nos indicadores turísticos do sector hoteleiro rexistrados o pasado mes de xuño cando por primeira vez superou o millón de noites acadando 1.011.613 noites realizadas polos 573.849 visitantes dese mes. Isto tradúcese nun incremento do 5 % en demanda turística e do 7,5 % en número de visitantes; nos dous casos por riba das medias nacionais, que se sitúan no 2,1 % e no 3,3 %, respectivamente. Estas boas cifras tamén se trasladan ao bo rendemento económico ao confirmar que no que vai de ano, de xaneiro a xuño, o sector hoteleiro galego obtivo uns ingresos nominais de 165,5 M, un 4,3 % máis que nos seis primeiros meses de 2024.
Do total das 21 etapas que compoñen esta edición de La Vuelta , tres desenvolveranse por solo galego. En concreto, o paso por Galicia deste certame será entre o 7 e o 10 de setembro. O día 7, na etapa 15, o grupo de competidores entrará na comunidade desde Asturias, no tramo A Veiga/Vegadeo-Monforte de Lemos. Tras dunha xornada de descanso, a competición retómase o día 9 coa etapa 16, que vai de Poio a Mos -rematando en concreto no Castro de Herville-. O día 10 de setembro, La Vuelta despídese da comunidade galega coa etapa 17, que por primeira vez sairá desde O Barco de Valdeorras para chegar, 143 quilómetros despois, ao Alto de El Morredero, xa en Ponferrada.
