lunes, 26 de enero de 2026
O conselleiro de Cultura, Lingua e Xuventude, José López Campos, presentou esta mañá o Festival IKFEM, centrado na música relacionada cos instrumentos de teclado, e que celebra a súa 12ª edición do 17 ao 21 de xullo en Tui e Valença do Minho co apoio da Xunta de Galicia. O evento transfronteirizo, que une o talento artístico da península, contará con actuacións en enclaves de especial interese patrimonial como a Igrexa de Santo Domingo de Tui.
Tal e como explicou o titular de Cultura da Xunta, nesta edición o certame ofrecerá concertos únicos como os protagonizados polo cantautor Salvador Sobral xunto co pianista Marco Mezquida ou a soprano María Hinojosa co galego Daniel Pereira ao teclado. Neste senso, José López Campos, enxalzou a oportunidade tan especial que ofrece o festival unindo artistas do mundo hispano, galego e lusófono, que raras veces se poden conectar. Ademais, dixo, é un evento que reforza os lazos entre Galicia e Portugal e enriquece unha oferta cultural de calidade aos dous lados do Miño.
O representante do Goberno galego tamén destacou a singularidade dos espazos, dando conta dos lugares históricos onde se organiza a programación e da peculiaridade de converter a ponte internacional que une Tui e Valença en escenario de varias das propostas.
Música e promoción doutras disciplinas artísticas
Rock sinfónico, jazz, música contemporánea e clásica protagonizan o programa desta edición, con actuacións como a do Coro da Orquestra Sinfónica de Galicia e o organista galego Adrián Regueiro; a unión dos pianistas Chano Domínguez e Mário Laginha; ou un concerto da Orquestra Sinfónica Eurorrexión Galicia-Norte de Portugal.
O evento complétase con actividades como son os diálogos con artistas e axentes sociais e distintos obradoiros, ademais dunha mostra que pon en valor o talento luso e español cunha selección sobre distintas disciplinas como o teatro, a danza, a literatura, a artesanía e mesmo a enogastronomía.
O conselleiro de Cultura, Lingua e Xuventude, José López Campos, reuniuse en Madrid co ministro de Cultura, Ernest Urtasun, para coordinar conxuntamente actuacións para ofrecer o máximo impulso á candidatura da Ribeira Sacra a Patrimonio Mundial pola Unesco para os vindeiros meses, ante a avaliación que terá lugar en xullo no Comité deste organismo, que se celebrará en Corea do Sur. O titular de Cultura lembrou que 'Ribeira Sacra: Paisaxe da auga' foi seleccionada como a candidatura de España para ter este recoñecemento internacional polo atributos 'excepcionais e únicos' deste territorio. Neste senso, incidiu en que se presenta unha paisaxe construída co uso da auga 'dun xeito novidoso que non está presente aínda de xeito suficiente na Lista de Patrimonio Mundial', argumentou.
O virus respiratorio sincitial (VRS) continúa a aumentar a taxa de positividade e xa é do 9,8 % na semana 3 do ano (do 12 ao 18 de xaneiro), cando a semana anterior era do 8 %, segundo se recolle no informe semanal de seguimento deste virus que publica a Consellería de Sanidade. Nesta última semana, obsérvase un incremento na taxa de consultas en atención primaria por bronquiolite en menores de dous anos. En concreto, o incremento foi do 5 % no grupo de nacidos entre abril e setembro de 2025. Para o global de menores de dous anos a taxa aumentou un 20,4 % con respecto á semana previa.
