lunes, 2 de noviembre de 2026
O director xeral de Relacións Exteriores e coa UE, Jesús Gamallo, reuniuse esta mañá cos responsables da AECT Rio Minho para coñecer de primeira man as prioridades e os proxectos que ten en marcha este instrumento de cooperación que abrangue 16 concellos da provincia de Pontevedra e 10 da CIM Alto Minho.
Xunto co director xeral, asistiron o director da AECT Rio Miño e alcalde da Guarda, Roberto Álvarez; o vicedirector e alcalde de Vila Nova de Cerveira, Rui Teixeira; o presidente da CIM Alto Minho e alcalde de Melgaço, Manoel Batista, e os alcaldes de Salvaterra, Marta Valcárcel, de As Neves, José Manuel Alfonso e de Tui, Enrique Cabaleiro. Ademais de tratarse temas de actualidade relacionados co funcionamento da institución, examináronse aspectos vinculados coa cooperación transfronteiriza co obxectivo de mellorar as condicións e a calidade de vida da cidadanía das zonas limítrofes, potenciando as relacións entre territorios.
Esta é unha primeira visita que o director xeral de Relacións Exteriores e coa UE, Jesús Gamallo, continuará co resto de AECTs. Deste xeito, está previsto que se entreviste tamén cos responsables da AECT Chaves-Verín, e da futura AECT da Raia Seca, que xunto coa AECT Galicia-Norte de Portugal, comprenden todas as AECTs da Eurorrexión Galicia-Norte de Portugal.
Mentres que a GNP-AECT comprende toda a Eurorrexión Galicia-Norte de Portugal, as outras AECTs son de carácter mais local. A AECT Chave-Verín abrangue estes dous concellos, e a nova AECT toma como base a Reserva da Biosfera Transfronteiriza Gerês-Xurés e incluirá toda a raia seca entre a AECT Río Miño e a AECT de Chaves-Verín.
As Agrupacións Europeas de Cooperación Territorial (AECT) buscan impulsar a cooperación territorial, en especial aquela de carácter transfronteirizo, entre institucións de dous ou mais países, dotándoas de personalidade xurídica. O seu obxectivo fundamental é facilitar e promover a cooperación territorial entre os seus membros a través de, entre outras, as accións que lle sexan confiadas para a execución de programas ou de proxectos cofinanciados principalmente polo Fondo Europeo de Desenvolvemento Rexional, o Fondo Social Europeo, ou o Fondo de Cohesión.
O XXXVI Festival de Jazz de Lugo ofrecerá do 4 ao 14 de novembro un total de 22 actuacións que combinarán grandes figuras internacionais cunha ampla presenza de músicos galegos en catro escenarios. Conforme ao programa, o Auditorio Fuxan os Ventos acollerá a apertura o mércores 4 co trío do saxofonista e clarinetista cubano Paquito DRivera. Neste mesmo escenario actuarán Abe Rábade, o día 8, e Kenny Barron Trio, o 11. No Círculo das Artes sucederanse James Carter Organ Trio, o 5 de novembro; Jogo de Damas, o día 6; Takuya Kuroda Quintet, o 7; Patricia Brennan Septet, o día 12; Erik Truffaz & Antonio Lizana, o día 13, e Clarence Bekker Band, o 14 de novembro.
O informe da Dirección Xeral de Saúde Pública da Consellería de Sanidade sobre a actividade das infeccións respiratorias agudas referido á semana que rematou o 25 de outubro reflicte que a actividade gripal na comunidade mantén o seu nivel basal con tendencia crecente, constatando un incremento na dispensación de antigripais nas farmacias galegas. En concreto, a taxa de dispensación de antigripais nas farmacias aumentou un 38,9 % na última semana, mentres que a de probas de antíxenos se reduciu nun 17,9 %, tal e como informan as oficinas de farmacia integradas na rede sentinela impulsada pola Xunta, co obxectivo de anticipar a evolución dos virus respiratorios na comunidade.
