domingo, 1 de noviembre de 2026
A cuarta edición do festival de maxia Galicia Ilusiona pecha esta fin de semana en Ferrol a súa programación anual de galas que, co apoio de Turismo de Galicia, ampliou este ano o seu alcance, chegando a oito localidades galegas. A delegada territorial de Ferrol, Martina Aneiros, presentou o evento que terá no teatro Jofre cinco pases - o sábado 18, ás 18.00 e ás 20.30 horas e o domingo 19, ás 12.30, 18.00 e 20.30 horas-.
Durante a presentación, na que Aneiros estivo acompañada do concelleiro de Festas de Ferrol, Arán López, e dos directores da gala, Dani Polo e Pedro Bugarín, deuse conta do crecemento que ten experimentado o festival e o éxito de público acadado -este ano esperan chegar aos 100.000 espectadores acumulados ao longo das catro edicións-.
A representante da Xunta destacou a contribución deste tipo de eventos a seguir incrementando os atractivos da cidade como destino urbano e o potencial turístico de toda a Comunidade autónoma.
A programación inclúe nesta edición a presenza de artistas internacionais multipremiados que visitan Galicia por primeira vez para ofrecer espectáculos únicos. Entre eles, Seimei , un mago manipulador coreano premiado coa variña de ouro de Monte Carlo; a Compañía Mag Edgard, premiada co premio FISM Turín 2025 a mellor espectáculo mundial; Nacho Samena, talento galego emerxente premio nacional de maxia 2024; David Burlet, artista carismático premio ao mellor malabarista francés durante 3 anos seguidos e o Mago Murphy, presentador e mestre de cerimonias con numerosos premios nacionais ao mellor presentador de galas internacionais.
O XXXVI Festival de Jazz de Lugo ofrecerá do 4 ao 14 de novembro un total de 22 actuacións que combinarán grandes figuras internacionais cunha ampla presenza de músicos galegos en catro escenarios. Conforme ao programa, o Auditorio Fuxan os Ventos acollerá a apertura o mércores 4 co trío do saxofonista e clarinetista cubano Paquito DRivera. Neste mesmo escenario actuarán Abe Rábade, o día 8, e Kenny Barron Trio, o 11. No Círculo das Artes sucederanse James Carter Organ Trio, o 5 de novembro; Jogo de Damas, o día 6; Takuya Kuroda Quintet, o 7; Patricia Brennan Septet, o día 12; Erik Truffaz & Antonio Lizana, o día 13, e Clarence Bekker Band, o 14 de novembro.
O informe da Dirección Xeral de Saúde Pública da Consellería de Sanidade sobre a actividade das infeccións respiratorias agudas referido á semana que rematou o 25 de outubro reflicte que a actividade gripal na comunidade mantén o seu nivel basal con tendencia crecente, constatando un incremento na dispensación de antigripais nas farmacias galegas. En concreto, a taxa de dispensación de antigripais nas farmacias aumentou un 38,9 % na última semana, mentres que a de probas de antíxenos se reduciu nun 17,9 %, tal e como informan as oficinas de farmacia integradas na rede sentinela impulsada pola Xunta, co obxectivo de anticipar a evolución dos virus respiratorios na comunidade.
