lunes, 29 de abril de 2024
O programa TRC Danza, organizado polo Teatro Rosalía Castro da Coruña co apoio da Xunta para promover as artes do movemento coa exhibición de 13 espectáculos e 39 actividades de mediación para o fomento de públicos arredor desta disciplina escénica, presentou hoxe a súa carteleira nun acto que contou coa participación do director da Axencia Galega das Industrias Culturais, Jacobo Sutil.
TRC Danza 2024, que se articula anualmente en dous bloques temporais de primavera e outono, inclúe tres pezas programadas no marco da Rede Galega de Teatros e Auditorios e contén outras propostas creadas coa contribución das subvencións á creación escénica ou como coprodución co Centro Coreográfico Galego, ademais de acadar un patrocinio específico para toda as citas de mediación. Así o explicou o representante da Consellería de Cultura, Educación, FP e Universidades, quen se referiu a TRC Danza como proxecto pioneiro en España pola súa celebración desde o ano 2013 e co apoio da Administración autonómica desde a súa primeira edición.
Para o responsable da Axencia Galega das Industrias Culturais se están a dar pasos importantes na normalización dunha expresión artística na que Galicia está a despuntar de xeito notable a nivel creativo, de produción e de interpretación, con diversas liñas de acción que parten do Plan integral da danza de Galicia.
Proxección exterior e interior da danza galega
Jacobo Sutil enumerou outros apoios como a colaboración da Xunta en proxectos como Atopémonos bailando, Residencias Paraíso, Abanea, 6Coreógrafas ou A Casa Vella, coa protección especial á danza nas convocatorias de subvencións e nas dinámicas de programación dos circuítos de espectáculos que se impulsan desde o Goberno galego.
Engadiu que nesta mesma dinámica se sitúa o actual curso Deseño de programacións de artes escénicas, organizado xunto á Asociación de Xestores Culturais e no que a danza ten un peso destacado, con contidos sobre a importancia da mediación e co obxectivo de dotar de recursos as persoas encargadas da selección de espectáculos nos espazos de exhibición para potenciar e incrementar a visibilidade desta arte a todos os niveis.
Citou tamén o novo acordo asinado entre a Xunta e a emblemática mostra Dansa València, en virtude do que dúas figuras xa destacadas na danza galega actual, como son Paula Quintas e Marcia Vázquez, actuarán no certame que acollerá a capital valenciana a vindeira semana.
Estrea absoluta de Anöa
A programación de TRC Danza 2024 arranca o próximo venres 19 de abril no Teatro Rosalía Castro coa estrea absoluta de Anöa, a nova proposta da compañía da coreógrafa e directora Elvi Balboa, en coprodución co Centro Coreográfico dentro da modalidade para potenciar o talento emerxente, e como parte da programación da Rede Galega de Teatros e Auditorios.
Xa máis preto do 29 de abril, Día Internacional da Danza, pisarán o mesmo escenario outros dous espectáculos no marco do circuíto autonómico: Multiperspectivas#2 de Paula Quintas Cía. (venres 26 de abril), unha proposta que combina improvisación teatral, danza e circo, e É difícil fotografar o baleiro, creado por Colectivo D´Elas e dirixido por Julia Laport, con seis intérpretes cuestionándose se hai algo máis aló do corpo (sábado 27 de abril). Estas dúas últimas pezas, producidas coa subvención da Xunta.
O xoves 16 de maio chegará Ceibe, a nova produción de Fran Sieira Cía., que tamén obtivo subvención da Xunta á creación escénica. O espectáculo, que conta no seu corpo de baile con Aida Tarrío, de Tanxugueiras, e Martín Mondragón, do proxecto Mondra, indaga nas identidades de xénero enas normativas hexemónicas do baile tradicional galego, experimentando co folclore popular para crear unha linguaxe máis inclusiva.
A oferta do TRC Danza Primavera complétase con Go Figure, de Sharon Fridman (venres 3 de maio); Otempodiz, da Compañía Ertza, A raíz de, de Daniel Rodríguez Cía. (sábado 4 de maio), e Placton, unha proposta contemporánea para público familiar do colectivo Big Bouncers (o luns 20 de maio no Fórum Metropolitano).
Janet Novás no outono e 39 accións de mediación
Abrirá o programa de outono no TRC Danza o 21 de setembro Janet Novás con PROTO (SN1806), con dramaturxia de Ricardo Santana e con Yuantao Gorriz, Julia Kayser e Danielle Mesquita como intérpretes. Trátase dunha coprodución coa Xunta de Galicia a través do Centro Coreográfico na que a coreógrafa e bailarina, Premio Goya á Mellor Actriz Revelación 2023, toma como punto de partida o fenómeno das supernovas.
Dentro da estratexia de impulso á danza, as actividades de mediación intégranse plenamente na liña de traballo da Xunta co sector. No caso do TRC Danza serán 39 as accións desenvolvidas, xa que cada un dos 13 espectáculos programados xerará tres accións encamiñadas ao fomento e consolidación de públicos. A creación de contexto a través de textos elaborados por especialistas, a implicación das compañías e artistas en sesións prácticas previas e conversas co público tras as funcións son os eixos de acción deste apartado.
O director xeral de Relacións Exteriores e coa UE, Jesús Gamallo, reuniuse esta mañá cos responsables da AECT Rio Minho para coñecer de primeira man as prioridades e os proxectos que ten en marcha este instrumento de cooperación que abrangue 16 concellos da provincia de Pontevedra e 10 da CIM Alto Minho. Esta é unha primeira visita que o director xeral de Relacións Exteriores e coa UE, Jesús Gamallo, continuará co resto de AECTs. Deste xeito, está previsto que se entreviste tamén cos responsables da AECT Chaves-Verín, e da futura AECT da Raia Seca.
A Cidade da Cultura volve acoller a colorida e festiva carreira Holi Gaiás, que vai pola súa sexta edición. A proba terá lugar o sábado 8 de xuño nos exteriores do complexo e nesta ocasión contará cun percorrido especial para a cativada entre 4 e 9 anos, a Peque Holi. A actividade lúdico festiva contará un ano máis coa súa tradicional poeira de cores e con animación previa e posterior á proba, con música e coreografías que animarán aos participantes durante a mañá. A carreira celébrase co obxectivo de gozar coa práctica deportiva nun enclave singular como é o Gaiás, coa súa característica arquitectura e co seu gran pulmón verde, o Bosque de Galicia. Está artellada co ánimo de que os participantes o pasen ben durante o percorrido e no fin de festa.
