viernes, 6 de noviembre de 2026
En concreto, detallan os autores do documento, a medra interanual sitúase no 1,8%, sete décimas inferior á media española, e catro décimas con respecto á UE.
Sectores e mercado de traballo
O crecemento do PIB real en Galicia, apuntan os economistas, caracterízase por unha achega positiva da demanda externa (dun punto fronte ás oito décimas da demanda interna). Dende o punto de vista da oferta, Galicia presenta segundo o informe "unha importante desaceleración do sector terciario, se ben mantense como o sector coa taxa de crecemento interanual máis elevada: 2,3%". Igualmente salientan o crecemento da industria manufactureira e da construción, cunha medra do 1,7% e 0,8%, respectivamente, e o feito de que o sector primario presenta "unha contracción aínda que desta volta menos acusada" que na media española (-0,9% e -2%, respectivamente). Un dos principais problemas da economía galega segue a ser a produtividade relativa do tecido produtivo galego en relación á media de España. A fenda máis ampla prodúcese na industria manufactureira, afirman os economistas. Por contra, detallan, o sector da construción presenta unha produtividade superior á media estatal.
O mercado de traballo galego presenta un balance positivo, segundo recolle o informe. Melloran as taxas de actividade e de emprego, reducíndose tanto a taxa de desemprego como a taxa da temporalidade, "o cal adoita ser un indicador da mellora da calidade de emprego". Con todo, desde o Foro Económico de Galicia sinalan que "estes datos teñen que ser matizados novamente tendo en conta que Galicia mantense entre as comunidades autónomas con menores taxas de actividade e ocupación". A poboación ocupada medra un 2,3% (grazas á poboación estranxeira), seis décimas por riba do estimado en 2022, e os postos de traballo equivalente un 2%. Doutra banda, as afiliacións medran un 1,8% e as horas traballadas un 1,6% fronte ao 2,1% e 1,7% rexistrados no ano precedente. No perfil do emprego novo, no informe destacan as mulleres e os estranxeiros non comunitarios. "A meirande parte do emprego creado é emprego asalariado, diminuíndo, pola contra, o número de persoas empresarias empregadoras", afirman. Por último, todo o emprego creado é segundo o informe presentado indefinido, "salientando ao mesmo tempo o maior dinamismo do emprego a tempo parcial que a tempo completo". No que ao desemprego se refire, as taxas recollidas reflicten que afecta en maior medida ás mulleres, persoas menores de 25 anos, estranxeiros e cidadáns con estudos primarios.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
