jueves, 24 de septiembre de 2026
O secretario xeral de Política Lingüística, Valentín García, participou hoxe na presentación da sétima edición do festival de poesía Alguén que respira!, impulsado polo Concello de Santiago co apoio da Xunta de Galicia e da Universidade de Santiago de Compostela (USC).
A iniciativa, que se celebra cada ano arredor do Día Mundial da Poesía e está dirixida por Antón Lopo, desenvolverase en Compostela do 21 ao 23 de marzo e reunirá poetas, xornalistas, activistas e artistas para crear un marco de reflexión sobre a realidade e a sociedade actual, centrándose na poesía en territorio de conflito, que será o eixo temático da edición.
O representante da Consellería de Cultura, Educación, FP e Universidades sinalou que por ser a poesía o territorio por excelencia do sentimento, ás veces pénsase que se centra no íntimo e individual e que non ten ou debe ter unha proxección cara á sociedade e os conflitos que nos rodean, pero realmente a poesía o que expresa é un xeito persoal de mirar, de mirarnos a nós mesmos pero tamén o mundo, cunha ollada que pode ser crítica, doída, furiosa ou esperanzada cando o que contemplamos é o sufrimento doutros seres humanos. Polo tanto, o do conflito, concluíu o secretario xeral, é tamén o territorio da poesía.
Tres días de programación
Durante tres días, recitais, concertos e faladoiros ocuparán o Teatro Principal e a Igrexa da Universidade reunindo representantes da cultura galega como María do Cebreiro, Abe Rábade, Guadi Galego, Su Garrido ou Alfonso Armada, este último responsable da lectura do manifesto, así como tamén artistas e activistas doutros países e culturas que converterán Compostela en centro galego da poesía.
Ademais, o festival repite seccións xa consolidadas no seu programa como As mañás do ambigú, que se desenvolverán cada mediodía no Teatro Principal a modo de foros de reflexión e nos que participarán Alfonso Armada e Carmen Villar, Cristina Sánchez e Iván Prado, e Caetano Díaz e Daniel González Palau, os días 21, 22 e 23, respectivamente.
Por segundo ano consecutivo, Alguén que respira! inclúe tamén os premios para o estudantado de Galicia que, baixo o lema A guerra fronte á construción da paz, recibiu máis dun cento de propostas entre as catro categorías convocadas. As persoas gañadoras, que recollerán os premios no recital de clausura do festival, foron Aroa Misa, de primaria; Claudia Romero, de secundaria, e Serxio Abalo, da categoría universitaria. A categoría de bacharelato e ciclos formativos quedou deserta por decisión do xurado.
Todas as persoas interesadas en asistir ao festival poderán recoller as entradas, que serán de balde, na web Compostela Cultura ou no despacho de billetes da Zona C. Tamén poderán retirarse do despacho de billetes do Teatro Principal unha hora antes de comezar cada actuación. O programa completo pode consultarse na páxina oficial de Alguén que respira!.
A Consellería de Educación vai dotar aos centros educativos de apoios específicos de acompañamento, formación e recursos materiais para desenvolver os novos programas de reforzo Avanza Lectura e Avanza Matemáticas, que se van poñer en marcha este curso en Primaria ao abeiro do novo Marco galego para o impulso educativo. O conselleiro Román Rodríguez reuniuse co Consello Escolar de Galicia para avaliar o inicio de curso e dar conta das accións da Xunta enfocadas a 'reforzar aprendizaxes apoiando a quen máis o precise, fomentar a cultura do esforzo e impulsar unha mellora integral e continua do sistema'.
O Consello da Xunta analizou na súa reunión de hoxe un informe da Consellería do Medio Rural sobre o anteproxecto de Lei de loita contra os incendios forestais de Galicia (LLCIF), antes da súa remisión para consulta ao Consello Forestal de Galicia, cuxa reunión está prevista para mañá martes. A futura normativa prioriza reforzar a protección da poboación e a xestión integral do territorio. O presidente do Goberno autonómico, Alfonso Rueda, lembrou que actual lexislación sobre incendios forestais 'ten case 20 anos' e 'cómpre actualizarla e adaptala aos novos tipos de lumes así como aos avances que houbo tanto na loita como na prevención de incendios'.
