lunes, 2 de noviembre de 2026
O presidente da Xunta, Alfonso Rueda, anunciou hoxe que a Xunta vai desenvolver un marco normativo para regular a protección dos dereitos de propiedade intelectual e industrial xurdidos na Formación Profesional galega. Galicia vai ser a primeira comunidade en contar cunha regulación neste eido, resaltou.
Trátase dun paso esencial para blindar que os resultados de investigación e innovación aplicada xurdidos do traballo do alumnado dos centros educativos de Formación Profesional revertan no sistema educativo. Deste marco regulador tamén se vai beneficiar o profesorado e as empresas e entidades que prestan a súa colaboración nos distintos ciclos de Formación Profesional.
O presidente salientou que cada vez son máis as creacións ou as actividades dos centros de FP que derivan en produtos que poden ter unha utilidade comercial e que cómpre garantir a súa protección intelectual e industrial.
A regulación abrangue os títulos de propiedade intelectual e industrial, as patentes, os modelos de utilidade, deseños industriais, marcas, nomes comerciais, nomes de dominio, segredos industriais e programas informáticos entre outros.
Tal e como explicou Rueda, establécese que o Centro Galego de Innovación da FP será o encargado da xestión integral dos resultados da investigación é a innovación que realicen os alumnos e profesores para garantir a súa protección.
Un procedemento en catro pasos
Para acadar esta protección, a Consellería de Educación establecerá un procedemento de xestión que inclúe catro pasos que son a comunicación, avaliación e protección dos resultados e o mantemento da protección.
O presidente indicou que, en primeiro lugar, as persoas inventoras, en coordinación coa dirección do centro, comunicarán ao Centro Galego de Innovación da FP a obtención dos resultados de innovación susceptibles de seren protexidos. A partir de aí entra a segunda fase, de avaliación dos resultados, no decurso da cal este centro valorará o seu impacto e decidirá se procede a súa protección en función da calidade e características, priorizando o impacto no mundo rural e a redución da fenda de xénero.
Na terceira fase, de protección dos resultados, o Centro Galego de Innovación da FP asumirá os custos derivados de solicitar a protección e o seu mantemento a nivel nacional, que se poderá estender a nivel internacional no caso de ter a suficiente relevancia. E, por último, tal e como indicou Rueda, haberá unha avaliación cada dous anos para revisar se cómpre manter esta protección.
Paralelamente, levaranse a cabo distintas actividades de promoción e difusión da propiedade intelectual e industrial para dar a coñecer a carteira de patentes e modelos de utilidade entre o ecosistema da Formación Profesional galega. O obxectivo último é maximizar a transferencia de I+D+i e a creación de novas empresas de base tecnolóxica industrial.
Estratexia de FP e Plan Innova FP
Esta iniciativa enmárcase no desenvolvemento da Estratexia de FP Galicia 2030, ao abeiro da cal se puxo en marcha o Plan Innova FP Galicia para o impulso de liñas de actuación que avancen na innovación, investigación aplicada e no emprendemento tecnolóxico e industrial na Formación Profesional galega.
A este reto tamén responde o Programa InnovaTech FP, no que alumnado dos diferentes ciclos formativos deberá afrontar dez desafíos tecnolóxicos propostos por empresas, e cuxas solucións deberán xerar un impacto positivo no desenvolvemento do medio rural.
As solucións seleccionadas incorporaranse á área de emprendemento industrial do Centro Galego de Innovación da FP, onde contarán cos medios dispoñibles para a súa incubación e aceleración, podendo derivar na creación de empresas innovadoras e de base tecnolóxica.
O XXXVI Festival de Jazz de Lugo ofrecerá do 4 ao 14 de novembro un total de 22 actuacións que combinarán grandes figuras internacionais cunha ampla presenza de músicos galegos en catro escenarios. Conforme ao programa, o Auditorio Fuxan os Ventos acollerá a apertura o mércores 4 co trío do saxofonista e clarinetista cubano Paquito DRivera. Neste mesmo escenario actuarán Abe Rábade, o día 8, e Kenny Barron Trio, o 11. No Círculo das Artes sucederanse James Carter Organ Trio, o 5 de novembro; Jogo de Damas, o día 6; Takuya Kuroda Quintet, o 7; Patricia Brennan Septet, o día 12; Erik Truffaz & Antonio Lizana, o día 13, e Clarence Bekker Band, o 14 de novembro.
O informe da Dirección Xeral de Saúde Pública da Consellería de Sanidade sobre a actividade das infeccións respiratorias agudas referido á semana que rematou o 25 de outubro reflicte que a actividade gripal na comunidade mantén o seu nivel basal con tendencia crecente, constatando un incremento na dispensación de antigripais nas farmacias galegas. En concreto, a taxa de dispensación de antigripais nas farmacias aumentou un 38,9 % na última semana, mentres que a de probas de antíxenos se reduciu nun 17,9 %, tal e como informan as oficinas de farmacia integradas na rede sentinela impulsada pola Xunta, co obxectivo de anticipar a evolución dos virus respiratorios na comunidade.
