lunes, 2 de noviembre de 2026
No día de onte o persoal mobilizado polo Executivo galego sacou das praias algo máis de 300 quilos de pellets, o equivalente a 12 sacos deste material, así como 800 quilos doutro lixo presente na costa que pode depositarse no contedor amarelo.
Neste sentido, a vicepresidenta segunda detallou que o operativo de vixilancia, detección e limpeza, por terra e mar, despregado pola Xunta está integrado hoxe por máis de 400 efectivos repartidos por 58 praias pertencentes a 28 concellos. Mentres, por mar o Servizo de Gardacostas continúa a facer un seguimento da situación mantendo activos os helicópteros Pesca 1 e Pesca 2, catro embarcacións de gran porte (o Sebastián de Ocampo, o Irmáns García Nodal, o Ría de Vigo e a Mar de Galicia) así como 11 patrulleiras de menores dimensións. A este operativo engádese unicamente o avión de Salvamento Marítimo do Estado Rosalía de Castro.
Neste sentido, Ángeles Vázquez destacou o importante esforzo que realiza o persoal de Gardacostas para colaborar no operativo e cubrir a falta de medios do Goberno central sen desatender outras obrigas como o apoio aos máis de 4.000 buques pesqueiros e arredor de 2.000 barcos bateeiros da comunidade, o salvamento ou a vixilancia e control da frota. De feito, lembrou que o Pesca 2 participou a pasada madrugada no rescate de cinco tripulantes dun pesqueiro que embarrancou fronte a Ribadeo.
A responsable autonómica tamén incidiu en que as previsións meteorolóxicas e de correntes para os próximos días son menos favorables para a chegada de pellets á costa galega, tal como recolle a simulación realizada polos técnicos do Plan Territorial de Continxencias por Contaminación Mariña Accidental de Galicia (Plan Camgal) sobre a deriva dos sacos perdidos polo Toconao desde comezos de decembro.
Esa simulación dos profesionais do Plan Camgal está feita partindo da base de que todos os sacos saíron do contedor. Dese xeito estariamos practicamente libres dos sacos, pero non podemos afirmalo rotundamente, por iso pedimos información ao Goberno central sobre o estado do contedor e ese robot para, se aínda ten sacos dentro, poder selalo. Pero non tivemos ningún tipo de resposta, lamentou a vicepresidenta segunda en alusión a que o Executivo central, máis dun mes despois de producirse o incidente, aínda non fixo unha avaliación de riscos deste episodio.
Ángeles Vázquez tamén explicou que a Xunta está en contacto continuo cos concellos para recabar información sobre as cantidades de pellets recollidos polo seu persoal, voluntarios ou outras entidades e que teñen depositados nos seus almacéns para contar con información máis detallada da situación actual.
Comité de expertos
En canto á creación do comité científico, salientou que xa está conformado e que o próximo venres se celebrará o acto de constitución na sede do Instituto Tecnolóxico para o Control do Medio Mariño de Galicia (Intecmar). Neste organismo, aberto a novas incorporacións, están 17 expertos de 11 entidades entre as que se inclúen as tres universidades galegas, centros relacionados coa investigación do medio mariño, organizacións ambientais e outras administracións a través de organismos dependentes do Goberno central, detallou a representante do Executivo galego.
O obxectivo deste ente de nova creación será elaborar un plan de seguimento sobre os efectos dos plásticos a curto, medio e longo prazo; análise dos efectos deste material nos ecosistemas mariños, con especial atención á fauna mariña e da avifauna costeira; e valoración das boas prácticas e das regulamentacións necesarias para prever posibles verteduras plásticas. Ademais permitirá avanzar nas boas prácticas e avaliar cuestións de interese no eido normativo para trasladar ao Goberno central ou á Comisión Europea, engadiu a vicepresidenta segunda.
Ángeles Vázquez tamén informou de que a Xunta xa remitiu á Fiscalía un informe xeral e completo sobre a situación do episodio dos pellets en Galicia e do traballo feito non só nos espazos protexidos como o parque nacional ou o parque natural -aos que facía referencia a Fiscalía- senón de todo o acontecido desde o primeiro momento. Nesta liña, lamentou que Galicia segue sen noticias da activación dos plans nacionais de loita contra a contaminación mariña, polo que a Xunta se porá en contacto co Executivo central para ver que está a facer para reclamar a quen corresponde os danos causados pola perda dese contedor de pellets por parte do mercante Toconao.
O XXXVI Festival de Jazz de Lugo ofrecerá do 4 ao 14 de novembro un total de 22 actuacións que combinarán grandes figuras internacionais cunha ampla presenza de músicos galegos en catro escenarios. Conforme ao programa, o Auditorio Fuxan os Ventos acollerá a apertura o mércores 4 co trío do saxofonista e clarinetista cubano Paquito DRivera. Neste mesmo escenario actuarán Abe Rábade, o día 8, e Kenny Barron Trio, o 11. No Círculo das Artes sucederanse James Carter Organ Trio, o 5 de novembro; Jogo de Damas, o día 6; Takuya Kuroda Quintet, o 7; Patricia Brennan Septet, o día 12; Erik Truffaz & Antonio Lizana, o día 13, e Clarence Bekker Band, o 14 de novembro.
O informe da Dirección Xeral de Saúde Pública da Consellería de Sanidade sobre a actividade das infeccións respiratorias agudas referido á semana que rematou o 25 de outubro reflicte que a actividade gripal na comunidade mantén o seu nivel basal con tendencia crecente, constatando un incremento na dispensación de antigripais nas farmacias galegas. En concreto, a taxa de dispensación de antigripais nas farmacias aumentou un 38,9 % na última semana, mentres que a de probas de antíxenos se reduciu nun 17,9 %, tal e como informan as oficinas de farmacia integradas na rede sentinela impulsada pola Xunta, co obxectivo de anticipar a evolución dos virus respiratorios na comunidade.
