sábado, 20 de junio de 2026
Nesta reunión, a ministra propuxo o uso universal da máscara e a aposta polos plans de continxencia. O conselleiro recordoulle que os plans de continxencia existen desde antes da pandemia e, cada ano, se revisan despois do verán, para estar preparados ante a chegada, sobre todo, dos virus respiratorios.
Sobre o uso da máscara, a Xunta xa o recomendou en hospitais e centros de saúde hai 12 días, e por suposto, a súa utilización por parte de persoas con síntomas respiratorios, e vulnerables. En todo caso, o conselleiro sinalou que debe ser cada comunidade autónoma quen determine, entre as medidas dispoñibles e avaladas por criterios técnicos, aquelas que mellor se adapten á súa situación epidemiolóxica. De feito, aínda sendo prudentes, en Galicia o pico da gripe é posible que xa se superara, debido a que segue a baixar a positividade da mesma, que se sitúa nun 30 %, o que supón tres puntos menos que na semana pasada.
Sobre as "autobaixas" das incapacidades temporais, o conselleiro considera que é un tema moi delicado, que require do concurso doutros axentes, como da Seguridade Social, e que as improvisacións non axudan. Galicia está a favor de desburocratizar o traballo en atención primaria, pero sempre escoitando primeiro aos técnicos.
Comesaña recordou que a Xunta de Galicia adiantou en 15 días a campaña de vacinación contra a gripe e a ampliou ata o 12 de xaneiro. Tamén indicou o uso xeneralizado da máscara hai 12 días e tiña os plans de continxencia preparados e en uso dende o pasado mes de outubro.
Falta de profesionais
No que Galicia si está de acordo co Ministerio de Sanidade é na falta de profesionais, e "iso si require unha reunión urxente", -remarcou Comesaña-, quen sinalou que temos médicos nas súas merecidas vacacións destas datas, e oxalá houbera substitutos para cubrir esas ausencias. Faltan, por tanto, -insistiu Comesaña-, profesionais e é necesario formar máis médicos especialistas.
O conselleiro volveu solicitar á ministra un pleno extraordinario do Consello Interterritorial para abordar este asunto, e insistiu na necesidade de que o Goberno central flexibilice os criterios de acreditacións dos centros, co obxecto de que as comunidades autónomas teñan capacidade para formar máis profesionais
O programa formativo Medrando Xuntas permitiu que as mulleres participantes traballasen habilidades clave como a comunicación, a organización, o liderado, a toma de decisións, a participación interna e a mellora da confianza profesional, ao tempo que se fomentou a creación dunha rede de mulleres que se apoian, colaboran e comparten recursos e que se deron a coñecer proxectos que están a transformar a economía. En primeiro lugar, Medrando Xuntas contou cun programa formativo para reforzar a súa participación nas entidades de economía social. En segundo lugar, a formación para directivas estaba dirixida a mulleres con responsabilidades de dirección ou proxección cara ao liderado.
Unha alianza entre o Instituto Tecnolóxico de Galicia (ITG) e as compañías Naturgy InnovaHub e Flythings Technologies desenvolverá unha plataforma enerxética que transformará residuos en produtos de alto valor engadido. Neste caso transformaranse residuos como lodos de depuradora, restos orgánicos e biomasas, en produtos de alto valor engadido como biocombustibles (hidrochar e biometano) e vectores enerxéticos sostibles (hidróxeno e syngas). Para iso, a nova unidade mixta combinará distintas tecnoloxías e incorporará sistemas híbridos de almacenamento con baterías e supercondensadores, ademais de empregar ferramentas como Internet das cousas, os xemelgos dixitais e a aprendizaxe automática.
