sábado, 8 de agosto de 2026
A nova Axenda conta con máis de 360 millóns de euros de orzamento e estará artellada en 3 eixos de traballo para potenciar a calidade dos novos proxectos de autoemprego, fortalecer o ecosistema competitivo do emprego autónomo e avanzar no marco de cogobernanza para dinamizar este emprego.
Tal e como subliñou a conselleira, a Axenda permitirá seguir a impulsar a Rede de polos de emprendemento, que conta na actualidade con 11 centros activos. Tamén inclúe a nova medida de cota cero para os autónomos que se activará a partires de xaneiro para as novas altas rexistradas entre o 30 de setembro de 2023 e a mesma data de 2024.
Entre outras novidades apuntadas por Rivo, destacan as ferramentas deseñadas para impulsar a actividade destes profesionais e axudalos na posta en marcha dos seus negocios. A Xunta de Galicia creará así o Espazo Crece Autónomo, para a formación de calidade especializada e o impulso dun espazo virtual de demostración de sistemas tecnolóxicos e de mercado. E ofertará, por outra banda, o Paquete de inicio do autoemprego, que combinará cualificación, asesoramento e axudas ao investimento.
A Xunta seguirá ata 2027 a reforzar as liñas de axuda específicas para o inicio de actividade, a xeración do emprego por parte dos traballadores autónomos e a conciliación. Tamén incidirá na mellora da seguridade e saúde laboral e no benestar destes profesionais e impulsará a remuda xeracional como fórmula de mantemento dos negocios tras a xubilación das persoas titulares.
A nova Axenda incardínase no Plan Estratéxico de Galicia 2021-2030 para definir as liñas mestras a desenvolver para impulsar o emprego autónomo en Galicia ata o ano 2027.
Durante a anterior Estratexia Autónomo 2017-2020, e a pesares de coincidir coa pandemia, a Xunta apoiou a incorporación ao emprego autónomo de 16.704 persoas -3.913, menores de 30 anos- cun investimento global de máis de 160 millóns de euros, lembrou Rivo.
A peche de outubro, a comunidade galega sumaba máis de 214.000 profesionais autónomos de alta no réxime especial e do mar. Galicia é cun 20% do total de afiliados a 1ª comunidade con maior peso deste colectivo no total de cotizantes a nivel estatal e a 2ª con maior presenza de mulleres, que supoñen o 41% do colectivo.
O traballo autónomo é piar esencial para o crecemento económico e social de Galicia, coa paixón, determinación e habilidades únicas, os seus profesionais son motores de innovación permanente e axentes do cambio, afirmou a conselleira de Promoción do Emprego, quen lembrou que moitas das micro e pequenas empresas existentes en Galicia están lideradas por traballadores por conta propia.
A loita contra os incendios forestais suma un novo aliado tecnolóxico ao servizo de toda a sociedade. A aplicación móbil ALume, deseñada para facilitar que calquera persoa poida dar a alarma sobre un foco de lume de forma inmediata e precisa, xa se atopa plenamente operativa e dispoñible para a súa descarga de balde nas plataformas Android e iOS. O obxectivo principal desta ferramenta é potenciar a detección temperá dos incendios forestais. Nunha emerxencia no monte, os primeiros minutos son decisivos para evitar que un foco inicial se converta nun gran incendio; por iso, ALume nace para acurtar os tempos de aviso e facilitar ao servizo de extinción datos exactos antes de despregar os medios sobre o terreo. Cabe sinalar que a aplicación leva xa 7.000 descargas e 200 notificacións que axudaron ao operativo.
Un dos grandes atractivos desta undécima edición será a estrea de dez novos espectáculos, todos eles impulsados por compañías galegas, un dato que evidencia o dinamismo creativo do sector dos monicreques na Comunidade. A programación abrirase coa nova versión de A festa dos títeres, presentada por Viravolta, Vai de Roda e Títeres Alakrán, para continuar coa estrea de Treco-lerias, de Trécola Producións, e A rosa de papel, adaptación ao teatro de monicreques do texto de Valle-Inclán realizada por Alakrán.
