martes, 16 de junio de 2026
O documento elaborado por un equipo pertencente ás tres universidades galegas e coordinado dende a USC reúne anualmente datos de 2.000 individuos (poboación adulta de 18 a 65 anos) e dun panel de persoas expertas dos distintos ámbitos do ecosistema emprendedor galego. Con esta información e cunha metodoloxía propia do proxecto internacional Global Entrepreneurship Monitor, o equipo analiza a evolución anual da actividade emprendedora, o perfil da persoa emprendedora, as características das iniciativas emprendedoras e as condicións da contorna para emprender en Galicia.
O reitor da USC Antonio López, a conselleira de Promoción do Emprego e Igualdade, Elena Rivo; e o presidente da Confederación de Empresarios de Galicia (CEG), Juan Manuel Vieites inauguraron a xornada de presentación do Informe no que as profesoras da USC Loreto Fernández e Isabel Neira deron conta das principais conclusións do estudo.
Emprendemento feminino
No referido ás mulleres, o informe, que elabora a Universidade de Santiago de Compostela en colaboración coa CEG e a Xunta, amosa que o emprendemento feminino segue a crecer, cunha taxa de actividade emprendedora feminina que se sitúa no 6,7%, por encima da media deste indicador e case un punto e medio máis que en 2021 (5,3% en 2021). As iniciativas lideradas por mulleres mostran unha propensión a innovar, tanto en produto ou servizo (31%) como en tecnoloxía ou proceso (30%), e fano en maior medida que as promovidas por homes (18% e 26%, respectivamente).
No relativo á idade, a poboación emprendedora galega é máis nova que noutras ocasións, xa que a metade atópase entre 35 e 44 anos. É dicir, a porcentaxe de persoas deste grupo de idade que están a emprender achégase ao 11%, taxa máis alta de toda a serie analizada en todos os tramos de idade. Ademais de máis novos, son, do mesmo xeito que a xeración á que pertencen, máis formados: o 51% das emprendedoras e o 41% dos emprendedores teñen estudos universitarios. Destaca tamén a profesionalización, no sentido de que o 16% no caso feminino e o 18% no masculino cursaron un ciclo de formación profesional. A formación específica para emprender e a educación financeira son tamén características clave no proceso emprendedor. Así, tres de cada catro persoas emprendedoras afirman ter coñecementos medios ou altos sobre emprendemento en xeral e sobre finanzas de modo particular. O documento destaca tamén que, entre as persoas emprendedoras, un 8% teñen algún grao de discapacidade e un 14% son inmigrantes.
O informe GEM, ademais, como novidade este ano, inclúe unha monografía, no capítulo 6, sobre o papel da economía social en Galicia, que representa o 7% do PIB autonómico e implica a máis de 100.000 persoas na comunidade. Neste senso, o estudo GEM salienta que o modelo da economía social é cada vez máis valorado, sobre todo para as persoas con formación universitaria, e sinala a existencia dun maior interese por algunha das fórmulas de economía social nas empresas de recente creación.
A intelixencia artificial (IA), a súa gobernanza e o impacto na organizacións públicas centraron o II Encontro de Equipos de Tecnoloxías da Información e Comunicacións (TIC) das comunidades autónomas, celebrado hoxe en Madrid, no marco do Foro de Dixitalización das Comunidades Autónomas.A Xunta de Galicia estivo representada polo director da Axencia para a Modernización Tecnolóxica de Galicia (Amtega), Damián Rey, ao que acompañaron os responsables da Xerencia e das áreas de Administración Dixital, Infraestruturas e Seguridade, Solucións Tecnolóxicas Sectoriais, Transformación Dixital da Facenda Pública e a Oficina de Apoio Estratéxico e Planificación.
Deseñado e posto en marcha pola Consellería de Medio Ambiente e Cambio Climático a través de MeteoGalicia un servizo meteorolóxico de referencia na Comunidade, o chamado Sistema de Propagación de Incendios de Galicia (Spigal) permitirá dotar o operativo de loita contra o lume da Xunta dunha ferramenta tecnolóxica propia con capacidade para adaptarse á realidade en vivo, comparar distintos escenarios de evolución dun mesmo incendio e avaliar as medidas e actuacións en materia de extinción. Spigal superou xa unha fase de probas a partir dos datos reais dos incendios do verán pasado e está listo para entrar en funcionamento.
