domingo, 13 de julio de 2025
A compañía Nova Galega de Danza inicia os actos de celebración do seu 20º aniversario coa estrea este sábado 30 en Narón do seu novo espectáculo: Berro, producido co apoio da Xunta de Galicia e programado no marco da Rede Galega de Teatros e Auditorios. Esta montaxe de gran formato, que reunirá sobre as táboas un corpo de baile de sete intérpretes, é unhas das 29 producións de danza, novo circo, maxia e teatrobeneficiarias das subvencións outorgadas o pasado ano á creación escénica, liña de axudas á que a Consellería de Cultura, Educación, FP e Universidades destina 800.000 euros.
O director da Axencia Galega das Industrias Culturais, Jacobo Sutil, participou esta mañá na presentación aos medios de Berro, cuxa estrea se celebrará no Pazo da Cultura de Narón este sábado 30 de setembro ás 20,00 h. No acto tamén interviñeron o director de Nova Galega de Danza, Jaime Pablo Díaz; o responsable artístico da peza, Sharon Fridman e voceiros doutras entidades patrocinadoras.
O representante da Xunta gabou a traxectoria de Nova Galega de Danza, formación que tras dúas décadas de traballo, acadou por méritos propios o status de referente para o conxunto do sector escénico e de gran plataforma de lanzamento para multitude de profesionais da danza. Destacou, ademais, a proxección exterior dunha formación que se converteu na primeira compañía de baile galega en ser galardoada nos Premios Max das artes escénicas.
Frutífera colaboración
Na súa intervención, o responsable de Industrias Culturais lembrou así mesmo a frutífera colaboración que ao longo dos anos se estableceu entre Nova Galega de Danza e o Centro Coreográfico Galego da Xunta. Neste senso, lembrou as diferentes montaxes da compañía que viron á luz grazas ao programa de coproducións da unidade institucional de danza: Tradición, Son e Credo.
A liña de coprodución que impulsa o Centro Coreográfico Galego, así como a modalidade de danza dentro das axudas á creación escénica coa que se contribúe a estrea de Berro, contémplanse como ferramentas fundamentais no Plan Integral para a Danza en Galicia. Nesta folla de ruta, posta en marcha polo Executivo galego tras un proceso de diálogo co sector, establécense as prioridades e metas para fortalecer a vertente profesional desta disciplina.
O baleiro e o individuo
En Berro, Nova Galega de Danza preséntanos un espectáculo que procura recuperar a memoria colectiva. A montaxe configúrase ao redor do baleiro que supón ser individuos solitarios e illados nunha sociedade carente de memoria. A través do movemento, trázase unha viaxe que conecta cos estados emocionais e que amosa a importancia de recobrar a esencia ancestral.
O corpo de baile está conformado por Inés Vieites, Estefanía Gómez, Alba Cotelo, Laura Santamariña, Ricardo Fernández e Iván Villar, gañador do Premio Max ao mellor intérprete masculino de danza en 2021. A este elenco cómpre sumarlle a Jaime Pablo Díaz, que combinará o traballo coreográfico coa responsabilidade da dirección xeral do espectáculo.
O equipo artístico tamén inclúe a dirección coreográfica do galardoado artista israelí Sharon Fridman, quen tamén asume a iluminación, e a música do compositor coruñés Sergio Moure de Oteyza.
As entradas para a estrea do sábado pódense adquirir na páxina web do Padroado de Cultura de Narón. A xira de Berro continuará no Teatro Principal de Ourense o 28 de outubro e no Auditorio Municipal Cine Alovi das Pontes de García Rodríguez, o 2 de decembro, tamén estas dúas últimas funcións como parte da programación da Rede Galega de Teatros e Auditorios que cofinancia a Xunta de Galicia.
O Festival Abanea celebrará entre o 16 e o 20 de xullo a súa cuarta edición cun programa de danza contemporánea de distintos estilos que distribuirá 15 funcións de nove compañías entre os concellos de Ames, Outes, Marín, Foz e Celanova. ISMO Cultura, colectivo organizador do encontro, estenderá así a súa actividade de exhibición e dinamización ás catro provincias. A bailarina Andrea Castro presentou a primeira fase do espectáculo Lola y los lamentos, como artista seleccionada para o acompañamento bienal 20252026 co que o festival apoia procesos de creación de artistas emerxentes e que nesta edición terá como resultado a estrea de 'A mona de seda'.
As diversas actividades do festival terán lugar do 28 de xullo ao 1 de agosto no claustro do Mosteiro de San Salvador de Celanova. A actuación que inaugurará a cita será a da Banda de Música de Celanova con James Morrison, un concerto único en España que terá lugar ás 20,30 horas. Ademais deste, subirán ao escenario a Boston Brass de Estados Unidos, Abraham Cupeiro coa Orquestra Gaos e pechará a edición o Hércules Brass Ensemble dirixido por Isabel Rubio e coa Boston Brass e Adam rapa como solistas. Así, os concertos complementaranse con cinco días de actividades formativas para un centenar de estudantes procedentes de distintas comunidades autónomas. Clases de alto nivel da man dalgúns dos participantes nas actuacións e un seguimento continuo e individualizado que garante un acompañamento pedagóxico para o alumnado.
