miércoles, 23 de septiembre de 2026
Os datos estatísticos indican que en agosto 790.590 persoas aloxáronse nos establecementos hoteleiros galegos, xerando un total de 1.645.232 noites. Estas cifras mantéñense en niveis similares aos do ano anterior, con incrementos do 1% en cada un dos indicadores, e confirman a estabilidade do segmento hoteleiro en Galicia nos últimos exercicios. De feito, o número de noites do segundo mes do verán mantense no contorno dos máximos da serie histórica.
Os datos de agosto tamén analizan a procedencia da demanda. O 75% das noites hoteleiras corresponderon ao turismo nacional. Dentro deste mercado destaca especialmente o turismo receptor, é dicir, os visitantes procedentes doutras comunidades autónomas, que representan o 61% do total das noites.
Pola súa banda, o mercado internacional, con máis de 226.000 turistas aloxados en hoteis e pensións da comunidade, incrementouse o 16,6% con respecto a agosto de 2025. O número de noites rexistradas 403.171, o que se traduce nunha suba do 17,5%.
Entre xaneiro e agosto deste ano e á espera de incorporar os datos de agosto correspondentes ao turismo rural, albergues e cámpings, Galicia contabiliza 4,7 millóns de viaxeiros aloxados, que realizaron case 9 millóns de noites, un 2,3% máis que no mesmo período de 2025.
A Consellería de Educación vai dotar aos centros educativos de apoios específicos de acompañamento, formación e recursos materiais para desenvolver os novos programas de reforzo Avanza Lectura e Avanza Matemáticas, que se van poñer en marcha este curso en Primaria ao abeiro do novo Marco galego para o impulso educativo. O conselleiro Román Rodríguez reuniuse co Consello Escolar de Galicia para avaliar o inicio de curso e dar conta das accións da Xunta enfocadas a 'reforzar aprendizaxes apoiando a quen máis o precise, fomentar a cultura do esforzo e impulsar unha mellora integral e continua do sistema'.
O Consello da Xunta analizou na súa reunión de hoxe un informe da Consellería do Medio Rural sobre o anteproxecto de Lei de loita contra os incendios forestais de Galicia (LLCIF), antes da súa remisión para consulta ao Consello Forestal de Galicia, cuxa reunión está prevista para mañá martes. A futura normativa prioriza reforzar a protección da poboación e a xestión integral do territorio. O presidente do Goberno autonómico, Alfonso Rueda, lembrou que actual lexislación sobre incendios forestais 'ten case 20 anos' e 'cómpre actualizarla e adaptala aos novos tipos de lumes así como aos avances que houbo tanto na loita como na prevención de incendios'.
