viernes, 4 de julio de 2025
O Diario Oficial de Galicia vén de publicar a resolución do 12 de xullo de 2023 pola que se publica a relación vixente de persoas deportistas de alto nivel, alto rendemento e rendemento deportivo de base de Galicia e diferentes colectivos deportivos. O número total de deportistas galegos e galegas recoñecidos e recoñecidas xa supera o milleiro, unha cifra nunca antes acadada e presenta récords en todos os seus rexistros.
Neste sentido, dos 1.009 deportistas galegos recoñecidos (381 mulleres e 628 homes), o 80% (808) son deportistas galegos de alto nivel (299 mulleres e 509 homes). Ademais, hai 101 deportistas de rendemento deportivo de base (39 mulleres e 62 homes); 64 deportistas de alto rendemento (25 mulleres e 39 homes); 15 técnicos de alto nivel (catro mulleres e 11 homes); sete árbitras (cinco mulleres e dous homes); cinco xuízas (catro mulleres e un home) e nove deportistas galegos de alto nivel vitalicios (cinco mulleres e catro homes). Entre estes DGAN vitalicios atópanse algúns dos mellores deportistas de Galicia como Carlos Arévalo, Carlos Pérez Perucho, Teresa Portela e Cristian Toro (piragüismo), Támara Echegoyen, Nico Rodríguez e Sofía Toro (vela), Adi Iglesias (atletismo adaptado), Susana Rodríguez Gacio (paratríatlon) e Chano Rodríguez (natación adaptada). Cómpre salientar, asemade, que entre todas as categorías están recoñecidos 29 deportistas galegos con diversidade funcional (11 mulleres e 18 homes), o número máis alto da serie histórica, como na meirande parte do resto das categorías.
Estas cifras acadadas polo deporte de alto nivel de Galicia débense por unha banda, ao traballo e ao incremento de nivel dos deportistas de Galicia nos últimos anos, así como ao novo decreto de alto nivel publicado en setembro de 2020 que, ademais do deporte de alto nivel de Galicia, tamén recoñece o alto rendemento deportivo -práctica deportiva que aínda non pode ser cualificada de alto nivel pero cuxa proxección indica que estará en condicións de selo- e o rendemento deportivo de base -etapa de desenvolvemento e perfeccionamento previa a acadar o alto rendemento deportivo ou o alto nivel-. O mesmo ocorre coas categorías de técnicos-adestradores e xuíces-árbitros, novos colectivos que se incorporan a figura do alto nivel, a través da Comisión Galega de Avaliación do Alto nivel deportivo.
608 solicitudes tramitadas para as axudas DGAN 2023
Do mesmo xeito, no día de hoxe, a páxina web da Secretaría Xeral para o Deporte publica listaxe provisional de solicitudes admitidas, pendentes de subsanación e denegadas por no cumprir cos requisitos de persoas beneficiarias. Máis polo miúdo, das 976 posibles persoas solicitantes con recoñecemento en vigor nalgún momento do 2022 ou 2023 (104 persoas máis que na edición anterior), foron presentadas 608 solicitudes para as Axudas DGAN 2023 (cen máis que na edición anterior). Das solicitudes presentadas, o 83% (504) foron admitidas (81 máis que na edición anterior), mentres que 56 contan con cuestións a subsanar e outras 48 non cumpren co apartado de persoas beneficiarias.
Ademais da publicación desta listaxe, solicitáronse ás federacións deportivas galegas os certificados de resultados deportivos dos seus deportistas. As persoas que conten con cuestións a subsanar teñen dez días hábiles, ata o luns 7 de agosto de 2023 para facelo na sede electrónica da Xunta de Galicia ou en calquera rexistro oficial previsto no artigo 16 da Lei 39/2015, do 1 de outubro.
EuroPCom, a Conferencia Europea de Comunicación Pública, é a maior reunión anual de expertos en comunicación pública de Europa organizada polo Comité Europeo das Rexións en colaboración coa Comisión Europea, o Parlamento Europeo, o Consello, o Banco Europeo de Investimentos, o Comité Económico e Social Europeo e a Organización para a Cooperación e o Desenvolvemento Económicos. O evento ofrece unha plataforma para explorar as últimas tendencias, iniciativas e ideas no ámbito da comunicación pública. O director xeral de Relacións Exteriores e coa Unión Europea, Jesús Gamallo, participou nesta Conferencia organizada polo Comité Europeo das Rexións, e celebrada baixo o lema 'Máis alá das palabras. Unha historia de confianza'.
O Diario Oficial de Galicia publica hoxe a declaración de Ben de Interese Cultural da Rapa das Bestas de Sabucedo por considerar acreditado o seu valor sobranceiro como patrimonio inmaterial do pobo galego, ao tratarse dunha das festas máis antigas de Galicia que conta, como mínimo, con tres séculos de historia. Este recoñecemento supón a aplicación de inmediato do réxime de tutela da Lei de Patrimonio Cultural e, polo tanto, o maior nivel de protección. Esta distinción, que se suma á de Festa de Interese Turístico Internacional acadada en 2007, chega tras o visto e prace a este decreto por parte do Consello da Xunta este pasado luns, 30 de xullo, e logo de completarse o expediente administrativo, no que constan os dous informes preceptivos dos órganos consultivos favorables.
