sábado, 10 de mayo de 2025
O director xeral de Cultura da Xunta, Anxo M. Lorenzo, acompañado da directora-xerente da Fundación Cidade da Cultura, Ana Isabel Vázquez, deron a benvida esta semana aos membros desta terceira Residencia Literaria, que dirixe o escritor e profesor de escritura creativa Javier Peña. O representante da Xunta recordou que a residencia foi un dos primeiros apoios que tiveron autores que están agora a despuntar no panorama literario, como é o caso de Brais Lamela, premio da Crítica en narrativa en lingua galega o ano pasado, e Fran Fernández Dávila, gañador do Premio de Novela Curta Antón Risco 2023 co proxecto que traballou durante a súa estadía no Gaiás.
A proposta alíñase cun dos cinco eixes do Plan Xeración, a folla de ruta para acompañar neste 2023 o bo momento do sector que inclúe, entre os seus propósitos poñer en marcha medidas novas e reforzar as xa consolidadas que supoñan un apoio aos novos talentos.
Con actividades complementarias
Ao longo de 12 días de convivencia, os escritores novos comparten inquedanzas e consellos, críticas e eloxios nun ambiente de confianza e apoio mutuo. Ademais, contarán coa guía de dúas escritoras destacadas das letras galegas e españolas, Marilar Aleixandre Premio Nacional de Narrativa 2022 e a mexicana Brenda Navarro, que con tan só dúas novelas publicadas unha delas traducida xa a oito idiomas confírmase como unha das voces máis prometedoras das letras hispanas.
As actividades da Residencia Literaria complétanse con visitas á Casa Museo de Rosalía e á Fundación Camilo José Cela, encontros transversais con participantes doutras residencias artísticas na Cidade da Cultura e faladoiros especializados en temas de interese para os futuros escritores, como os dereitos de propiedade intelectual.
A Mostra Internacional de Teatro Cómico e Festivo de Cangas presentou hoxe a programación da súa 42ª edición, que se celebrará entre os días 22 de xuño e 6 de xullo no Auditorio Municipal Xosé Manuel Pazos Varela, así como nas rúas e noutros espazos da vila do Morrazo, que acollerán 26 espectáculos e un nutrido programa de actividades lúdicas e sectoriais. O certame, organizado desde 1984 pola Asociación Cultural Xiria, é un dos poucos festivais de teatro europeos cuxo principal selo de identidade é a comedia, unha marca consolidada e referente da produción escénica deste xénero en calquera das súas vertentes: negra, branca, xestual, contemporánea, circense, dramática, musical e, dende hai máis dunha década, tamén na danza.
A praza Conde de Fontao de Foz será o enclave elixido para a actuación extraordinaria do festival o 31 de xullo con La Carroza Del Real, mentres que o destacado pianista Denis Kozhukhin abrirá oficialmente o ciclo de concertos o 12 de agosto na Fortaleza de Alfoz. O 13 de agosto a Real Filharmonía de Galicia e o Coro da Comunidade de Madrid realizarán o primeiro concerto sinfónico-coral no que interpretarán o Réquiem de Mozart na Catedral de Mondoñedo. A clausura do XII Festival Bal y Gay será co barítono galego Borja Quiza, o 21 de agosto, no Teatro Pastor Díaz de Viveiro, cita na que tamén participarán o pianista Javier Carmena e a mezzosoprano Andrea Rey, nunha proposta que mesturará as raíces galegas e españolas.
