sábado, 8 de noviembre de 2025
O director xeral de Relacións Exteriores e coa UE, Jesús Gamallo, e o director xeral de Pesca, Acuicultura e Innovación Tecnolóxica, Antonio Basanta participaron hoxe con preto dun cento de representantes rexionais e locais europeos na presentación das primeiras ideas do ditame A Política Pesqueira Común sobre o terreo: cara a unhas comunidades costeiras sostibles e resilientes na UE.
A Comisión Europea presentou en febreiro un paquete de catro comunicacións co obxectivo de mellorar a sustentabilidade e a resiliencia do sector da pesca e acuicultura na UE. Entre as medidas propostas, inclúese a prohibición da pesca de arrastre de fondo nas áreas mariñas protexidas.
Neste contexto, Galicia está a liderar a resposta das rexións e municipios europeos, para o que hoxe Jesús Gamallo mantivo un primeiro debate cos membros de NAT. A intención da Xunta é plasmar unha visión rexional que contribúa a acadar un equilibrio entre as dimensións social, económica e medioambiental da Política Pesqueira Común (PPC). Durante o debate, diversos representantes destacaron a necesidade de salvagardar a pesca europea, para o que é necesario un maior diálogo co sector pesqueiro. A importancia dos produtos do mar na seguridade alimentaria na UE, a dificultade do relevo xeracional ou a descarbonización da actividade pesqueira foron outros dos temas abordados.
Progresos na sustentabilidade e a protección do consumidor
A comisión NAT tratou nesta reunión en Polonia outros dous ditames. Por unha parte, sobre o novo plan da Comisión para a protección dos consumidores fronte o chamado greenwashing, que avoga por unha harmonización da medición do impacto ambiental dos produtos elaborados na UE. O segundo ditame, sobre a sustentabilidade da agricultura europea, suxire a creación dun fondo da UE que poida emitir bonos catástrofe para aumentar a protección dos produtores europeos fronte crises.
Galicia na comisión NAT do Comité Europeo das Rexións
Neste sétimo mandato do CdR que deu comezo en 2020, Galicia participa na comisión de Recursos Naturais (NAT) e na comisión de Cidadanía, Gobernanza e Asuntos Institucionais e Exteriores (CIVEX). NAT prepara os ditames de opinión en áreas como as políticas comúns de agricultura e pesca, o turismo ou a saúde pública.
O Museo das Peregrinacións e de Santiago celebrará esta fin de semana obradoiros, concertos e un espectáculo de danzas do mundo no para conmemorar o décimo aniversario da apertura, na compostelá Praza das Praterías, da súa sede expositiva, un programa diverso e aberto a todos os públicos, para recoller a mesma esencia e cerna do museo. A programación do sábado, día 8, botará a andar ás 10,30 horas coa artesá Cristina Molares, quen desenvolverá un obradoiro de demostración de vidraría artística. Pola tarde, será a quenda de concertos musicais nas propias salas do museo para os que non será necesario inscribirse. A primeira das actuacións será a de Álex Salgueiro, ao clavicordio; á que lle seguirá Eloi Pérez cun repertorio de melodías celtas interpretadas con gaita irlandesa, e que rematará Juan Collado, un dos fundadores do grupo Odaiko Percussión, cun concerto de vibráfono.
O avance do último informe climatolóxico elaborado por MeteoGalicia indica que a Comunidade rexistrou un mes de outubro seco e moi cálido. En concreto, o pasado mes caracterizouse por unha primeira parte, ata o día 18, con predominio de altas presións, que deixaron tempo seco e moi cálido. A partir do día 19, as temperaturas descenderon e as precipitacións foron aparecendo con máis frecuencia e intensidade. Con todo, as temperaturas medias do mes quedaron moi por riba do que sería de agardar en outubro e as precipitacións que se foron acumulando nos últimos días non puideron chegar aos valores propios deste mes na maior parte de Galicia.
