viernes, 7 de agosto de 2026
A conselleira de Promoción do Emprego e Igualdade, María Jesús Lorenzana, avogou hoxe por unha cultura que impulse a sustentabilidade empresarial e polo emprego da intelixencia artificial para axustar de xeito máis áxil a oferta e a demanda de emprego, no marco da clausura da III Feira de Emprego da Escola de Relacións Laborais da Coruña, que nesta ocasión tivo por tema A intelixencia artificial na contorna laboral.
A titular de Promoción do Emprego lembrou que o seu departamento está a renovar de maneira íntegra o Servizo Público de Emprego de Galicia, para identificar, a través da intelixencia artificial e a analítica avanzada, as necesidades do mercado laboral en tempo real e así axustar axilmente e de maneira máis efectiva os perfís coas candidaturas.
Neste marco botará a andar nas oficinas de emprego a nova ferramenta tecnolóxica EMI (Emprego Intelixente), que entre outras funcionalidades contará cun navegador competencial, cun emulador de ocupacións e cun recomendador de formacións, que comezará a implantarse nas próximas semanas, e a modo de proxecto piloto en tres destas dependencias (Ordes, Pontevedra e Cambados).
Lorenzana dirixiu parte do seu discurso ao tecido empresarial para que aposte polo equilibrio entre o crecemento económico, o respecto ao medio ambiente e o benestar social. É importante que as empresas entendan que a sustentabilidade implica poder conseguir que o capital humano se quede, que todo o investido na súa formación faga crecer á empresa, indicou.
Coa forza laboral formada e as empresas coidando das súas traballadoras e traballadores, parece que o reto de vencellar oferta e demanda está xa máis próximo, manifestou en relación coa aposta que a Xunta de Galicia mantén para dar cobertura a postos vacantes na comunidade e poder, á vez, mellorar a ocupación de galegas e galegos.
O Goberno galego, dixo a conselleira, está a contribuír coas súas políticas activas de emprego a artellar medidas para que o casamento entre oferta e demanda de traballo resulte un proceso satisfactorio tanto para empregadores como para empregados.
Lorenzana puxo ao dispor do alumnado da ERLAC asistente á feira, por outra banda, a Rede de polos de emprendemento e apoio ao emprego, que promove a iniciativa empresarial por conta propia e brindará asesoramento especializado a través de 15 oficinas que darán cobertura, antes de que remate o ano, ao 100% do territorio galego.
Na feira de hoxe, que Lorenzana cualificou de oportunidade, tomaron parte unha vintena de empresas que achegaron ao alumnado un cento de ofertas de traballo. Destacou a posibilidade de que as persoas mozas conten con este punto de encontro que as conecta coa realidade do mercado laboral, achega información de utilidade e pode resultar precursora de novas oportunidades profesionais.
A loita contra os incendios forestais suma un novo aliado tecnolóxico ao servizo de toda a sociedade. A aplicación móbil ALume, deseñada para facilitar que calquera persoa poida dar a alarma sobre un foco de lume de forma inmediata e precisa, xa se atopa plenamente operativa e dispoñible para a súa descarga de balde nas plataformas Android e iOS. O obxectivo principal desta ferramenta é potenciar a detección temperá dos incendios forestais. Nunha emerxencia no monte, os primeiros minutos son decisivos para evitar que un foco inicial se converta nun gran incendio; por iso, ALume nace para acurtar os tempos de aviso e facilitar ao servizo de extinción datos exactos antes de despregar os medios sobre o terreo. Cabe sinalar que a aplicación leva xa 7.000 descargas e 200 notificacións que axudaron ao operativo.
Un dos grandes atractivos desta undécima edición será a estrea de dez novos espectáculos, todos eles impulsados por compañías galegas, un dato que evidencia o dinamismo creativo do sector dos monicreques na Comunidade. A programación abrirase coa nova versión de A festa dos títeres, presentada por Viravolta, Vai de Roda e Títeres Alakrán, para continuar coa estrea de Treco-lerias, de Trécola Producións, e A rosa de papel, adaptación ao teatro de monicreques do texto de Valle-Inclán realizada por Alakrán.
