sábado, 10 de octubre de 2026
Ana Vallés dirixe esta nova proposta de Matarile, coa que pecha unha triloxía en homenaxe á fraxilidade que deu comezo na pandemia con El diablo en la playa, de 2020, e que tivo a súa continuidade en 2022 con Inloca. Desta volta, a creadora reflexiona xunto ao seu equipo sobre unha Europa desde onde xa non se escribe a historia, ao tempo que aborda a fraxilidade do paseo, do que pasa, do que foxe, da conversación peregrina que nos leva, buscando algo, dun lugar a outro; aceptando o desarraigamento e asumindo o desexo de mostrar un saber torcido, iluminado oblicuamente.
Pau Cólera, Antón Coucheiro, Claudia Faci, Celeste González e Alfredo Pérez poñen en escena o texto e as coreografías da propia Vallés, con achegas dos cinco intérpretes e fragmentos de Mircea Cartarescu, George Steiner e María Zambrano.
Miguel Muñoz é o creador da iluminación, así como o espazo escénico xunto á directora e a Rubén Vilanova. O son e o vestiario están asinados pola compañía, que contou tamén con Xacobo Castro na edición de son, Rubén Vilanova na fotografía e vídeo, Diego Blanco no deseño gráfico, Daniel Baamonde e Nuria Sotelo na asistencia de dirección, Laura Sánchez na produción, coordinación e distribución, e Marcos Vieitez como axudante de produción, ademais de co acompañamento de Enrique Gavilán, Javier Méndez Oro, Isabel Iglesias, Pablo Sánchez e Jacobo Bugarín.
Estadía en Madrid
Fráxil. Handle with care poderá verse desde mañá e ata o día 21 no Salón Teatro antes de poñer rumbo cara a Madrid, onde permanecerá do 30 de xuño ao 16 de xullo nas Naves del Español en Matadero. En Santiago, as funcións terán lugar ás 20,00 h. de xoves a sábados e ás 18,00 h. os mércores e domingos.
As entradas poden adquirirse en liña a través da web entradas.ataquilla.com ou fisicamente no despacho de billetes da rúa Nova, 34 desde dúas horas antes do comezo das representacións. O seu prezo é de 10 euros, sobre o que se aplican os descontos habituais, e de 6 euros nas funcións dos mércores e nas dos domingos, Día do Espectador.
Creada en 1986 por Ana Vallés e Baltasar Patiño, Matarile Teatro é unha compañía pioneira e referente na escena contemporánea galega e española, con máis de 30 espectáculos, incontables performances e propostas sen formato concreto, polos que ten acadado máis de vinte premios e mencións en distintos puntos de España e Europa.
Foi presentada a novena edición de Intersección, Festival Internacional de Cine da Coruña, celebrada nos Cantones Cines. O festival desenvolverase do 13 ao 17 de outubro cunha programación que combina proxeccións, exposicións, formación e encontros profesionais arredor das novas linguaxes cinematográficas. Así, as seccións competitivas Galicia, Internacional e Fulgor achegarán ao público obras afastadas dos circuítos comerciais habituais e novas voces da creación audiovisual contemporánea. En concreto, a sección Internacional reúne 27 filmes procedentes de 22 países, entre os que figuran catro estreas mundiais, 17 en España e cinco en Galicia. As propostas exploran cuestións como a tecnoloxía, a memoria, o territorio e a identidade desde linguaxes e xeografías diversas.
A Real Academia Galega de Ciencias (RAGC) celebrou en Santiago, no Salón Nobre do Colexio de Fonseca, o acto do Día da Ciencia en Galicia, no que se homenaxeou á oceanógrafa Aida Fernández Ríos (Vigo, 1947 - Moaña, 2015) como Científica Galega 2026. Ademais, entregáronse as Medallas de Investigación a cinco científicas e científicos da nosa comunidade. O presidente da Academia destacou que 'Aida Fernández Ríos foi unha investigadora capaz de identificar problemas relevantes e de situalos nun contexto internacional, converténdose nunha científica respectada moito máis alá de Galicia.
