viernes, 6 de noviembre de 2026
O vicepresidente primeiro e conselleiro de Economía, Industria e Innovación, Francisco Conde, mantivo esta mañá un encontro con Patty Chang Chien, vicepresidenta e directora xeral de Boeing Research & Technology e outros representantes da compañía co obxectivo de abordar o marco de colaboración que esta mantén co Polo Aeroespacial de Galicia.
Neste sentido, Conde agradeceu a colaboración que Boeing está desenvolvendo desde o ano 2019 como un dos socios tecnolóxicos que está permitindo desenvolver os diferentes programas, e sinalou que desde Galicia se está a traballar para que no futuro Boeing poida permanecer e polo tanto se poida implicar nun proxecto que ten presentado, e que, a través dos fondos Next Generation poida ter a súa oportunidade.
Como socio tecnolóxico e industrial da Xunta desde 2019, a colaboración de Boeing foi determinante para que hoxe o CIAR de Rozas dispoña dun simulador de continxencias e do equipamento máis avanzado en Europa para a simulación de voos con vehículos aéreos non tripulados, que foi o campo no que centrou as súas investigacións. Neste momento tamén se desenvolven outras iniciativas como a Aula Newton na Tecnópole, ou a colaboración que manteñen coa Escola de Enxeñeiros Aeronáuticos da Universidade de Vigo.
O vicepresidente primeiro apuntou que Boeing é especialista no eido global para garantir a xestión de tráfico de avións tripulados e non tripulados e hai unha oportunidade para que siga traballando en Galicia neste tipo de proxectos. Conde incidiu en que a súa colaboración está sendo imprescindible precisamente para consolidar tecnoloxía e para consolidar talento, así como para seguir colaborando con pequenas e medianas empresas e centros tecnolóxicos galegos.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
