domingo, 6 de julio de 2025
Este ente está adscrito como consorcio autonómico á Comunidade Autonómica de Galicia, e así figura tanto no Inventario de entes do sector público do Ministerio de Hacienda como na relación dos consorcios autonómicos dos informes do Consello de Contas sobre o sector público autonómico. O dominio deste consorcio é eminentemente público, encabezado pola administración autonómica, que ostenta máis do 57% da titularidade xunto a un 14,3% do Concello da Coruña. Só o 28,5% da participación corresponde a unha entidade privada, a Fundación Centro Oncolóxico, unha fundación sen ánimo de lucro dirixida por un padroado do que forman parte cargos públicos como o conselleiro de Sanidade ou a alcaldesa da Coruña.
O convenio do ano 2016 aclara que non existe cesión da titularidade dos equipos, que sigue sendo do Sergas, senón unha posta a disposición do Consorcio dos mesmos, que decide que se localicen nas instalacións da Fundación Centro Oncolóxico seguindo o marcado por un convenio asinado o 8 de maio de 2008 entre Xunta e Fundación, no cal se consolida a prestación da radioterapia e medicina nuclear dos pacientes do Sergas do norte de Galicia neste centro.
En concreto, o dito convenio incluía como primeira cláusula a de Subscribir o presente convenio como manifestación do interese común que posúen as partes de prestar a asistencia sanitaria especializada en materia oncolóxica. Posteriormente, o Decreto 141/2008, do 19 de xuño, polo que se constitúe e regula a composición e funcións do Consorcio Oncolóxico de Galicia recolleu, na súa exposición de motivos, que a importancia da asistencia sanitaria en materia de oncoloxía esixe e xustifica a concepción e o deseño dun consorcio como organización idónea para facilitar a acción conxunta e coordinada das administracións públicas e institucións implicadas a través dun marco estable, ou que o Consorcio Oncolóxico de Galicia concíbese así como un instrumento executivo de esforzo combinado entre as entidades que o integran coa finalidade do aproveitamento eficiente de todos os recursos sanitarios en materia de oncoloxía, de xeito que se garanta aos cidadáns unha asistencia integral, de calidade e en condicións de igualdade.
É dicir, as actuacións rubricadas polo goberno bipartito consideraron que a organización idónea para facer un aproveitamento eficiente dos recursos sanitarios en materia de oncoloxía era consolidar esa colaboración entre o Sergas e a Fundación Centro Oncolóxico e a atención dos pacientes Sergas neste último.
Futuro traslado dos equipos ao Novo CHUAC
Nese contexto, toda vez que a estrutura asistencial fixada por eses acordos establece que as prestacións de radioterapia e medicina nuclear do norte de Galicia se realizarán nas instalacións da Fundación Centro Oncolóxico, a única alternativa posible cando o Sergas adquiriu novos equipos de radioterapia e medicina nuclear, foi poñelos a disposición do Consorcio creado en 2008 para colaborar con esta Fundación.
Aboal lembrou que esta situación mudará grazas ao plan funcional do Novo CHUAC aprobado en 2020, que posibilitou a redacción dun Plan Director dun proxecto arquitectónico da obra que incorporará áreas de radioterapia e medicina nuclear dentro das instalacións hospitalarias do Sergas na Coruña, mentres que os pacientes da área de Lugo teñen xa área de radioterapia no HULA con aceleradores lineais desde 2015, e terán á súa disposición un PET-TC de medicina nuclear neste mesmo ano 2023.
En consecuencia, mentres non se creen estes espazos no CHUAC, o Sergas seguirá a prestar os servizos de radioterapia e medicina nuclear na Coruña co esquema de colaboración formulado polo goberno bipartito e a través do Consorcio Oncolóxico creado polo goberno bipartito, por suposto en beneficio da asistencia sanitaria dos pacientes. Aboal aclarou, tamén, que, cando a Fundación utiliza estes equipos para tratar a pacientes externos ao sistema público, abona a correspondente cantidade ao Sergas en concepto de compensación por dispoñibilidade de uso e mantemento.
EuroPCom, a Conferencia Europea de Comunicación Pública, é a maior reunión anual de expertos en comunicación pública de Europa organizada polo Comité Europeo das Rexións en colaboración coa Comisión Europea, o Parlamento Europeo, o Consello, o Banco Europeo de Investimentos, o Comité Económico e Social Europeo e a Organización para a Cooperación e o Desenvolvemento Económicos. O evento ofrece unha plataforma para explorar as últimas tendencias, iniciativas e ideas no ámbito da comunicación pública. O director xeral de Relacións Exteriores e coa Unión Europea, Jesús Gamallo, participou nesta Conferencia organizada polo Comité Europeo das Rexións, e celebrada baixo o lema 'Máis alá das palabras. Unha historia de confianza'.
O Diario Oficial de Galicia publica hoxe a declaración de Ben de Interese Cultural da Rapa das Bestas de Sabucedo por considerar acreditado o seu valor sobranceiro como patrimonio inmaterial do pobo galego, ao tratarse dunha das festas máis antigas de Galicia que conta, como mínimo, con tres séculos de historia. Este recoñecemento supón a aplicación de inmediato do réxime de tutela da Lei de Patrimonio Cultural e, polo tanto, o maior nivel de protección. Esta distinción, que se suma á de Festa de Interese Turístico Internacional acadada en 2007, chega tras o visto e prace a este decreto por parte do Consello da Xunta este pasado luns, 30 de xullo, e logo de completarse o expediente administrativo, no que constan os dous informes preceptivos dos órganos consultivos favorables.
