sábado, 7 de noviembre de 2026
Referentes da abstracción, o informalismo ou a arte conceptual, como Eduardo Chillida, Antoni Tàpies, Ana Jotta ou Isidoro Valcárcel Medina, comparten espazo con artistas que están a despuntar a nivel nacional e internacional como Irma Álvarez-Laviada, David Bestué, Jordi Colomer, Jaume Plensa ou Teresa Solar Abboud, entre outros. Unha mostra do traballo de tres xeracións de creadores que exploran a relación simbólica entre os obxectos e os lugares que habitamos física e espiritualmente, confrontando tamén a obra artística co lugar no que se exhibe.
A modesta cabana de La habitación de la arquitectura prohibida, de Alicia Framis, por exemplo, cuestiona a funcionalidade do espazo ao que chamamos fogar, mentres Jaume Plensa, reflexiona en We, unha figura humana composta por letras de oito alfabetos distintos, sobre a diversidade e o que nos une.
Nesta escolma teñen tamén presenza catro artistas galegos: Antón Patiño, referente da abstracción en Galicia; Manolo Paz, escultor coñecido polos seus traballos coa seriación e a xeometría; Ángela de la Cruz, artista que se move entre a pintura e a escultura, a beleza e a violencia; e Christian García Bello, creador plástico que emprega en moitas das súas obras materiais atopados e reciclados aos que dota dun novo sentido.
De lugares e cousas. Colección de Arte Banco Sabadell pode visitarse no Museo Centro Gaiás de martes as domingo, en horario de 10 a 20 horas. Ademais, haberá visitas comentadas gratuítas ás 17.00 horas, todos os días da semana, excepto o sábado. Pódense reservar a través da web da Cidade da Cultura.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
