viernes, 18 de septiembre de 2026
O conselleiro de Cultura, Educación, FP e Universidades, Román Rodríguez, presentou hoxe na Conferencia Sectorial de Educación as alegacións de Galicia ao proxecto de real decreto de Ordenación do Sistema de Formación Profesional, centradas na falta dunha memoria económica e nas dificultades que se pon para incorporación de persoas expertas dos sectores produtivos como docentes.
Tal e como sinalou o conselleiro, o proxecto de real decreto non supón grandes novidades para a FP galega, dado que xa se están aplicando a maior parte das medidas desde hai tempo. De feito en Galicia xa se incorporou no currículo un módulo inglés nos currículos implantados nos últimos cursos, xa existen as dobres titulacións, a FP Dual xa está deseñada a medida das empresas e nos centros educativos xa se ofertan accións formativas para desempregados, destacou entre as cuestións de maior importancia.
En calquera caso, Román Rodríguez lamentou as présas do Goberno central por acelerar o proceso de desenvolvemento lexislativo e normativo antes das próximas eleccións estatais, o que dificulta a análise dos textos, o debate e a reflexión sosegada. De feito, no caso da análise deste real decreto, remitíronse documentos diferentes para a Conferencia Sectorial de hoxe e para as reunións técnicas previas. O último documento corrixe varias cuestións e incorpora suxerencias de outras comunidades que aínda non puidemos estudar, explicou.
Falta de financiamento
O titular do departamento educativo da Xunta sinalou como a principal eiva do novo texto a falta dunha memoria económica, que tampouco figura na nova lei de FP. Neste sentido, explicou que a posta en marcha de determinadas medidas como a redución de ratios (e, como consecuencia, a necesidade de adquirir equipamentos para os novos grupos), os cursos de formación específicos preparatorios para o acceso á FP de grao superior ou o incremento das axudas ao desprazamento do alumnado vai supoñer un sobrecusto que o Ministerio non aclara como financiar.
Volvemos estar, como xa vén sendo habitual, cun exemplo de normativa na que o Goberno central impón medidas que deben sufragar, sen apoio, as comunidades autónomas. Por exemplo a equiparación salarial dos profesores técnicos de FP supón só en Galicia un investimento anual de 3,5M que asume a Xunta en solitario, lembrou.
Expertos do sector produtivo
No caso dos profesores expertos do sector produtivo, as alegacións feitas desde a Xunta advirten de que o proxecto normativo permite só a contratación destas persoas se non houbese outro docente dispoñible. Isto limita a posible incorporación á docencia desta figura clave para a FP lamentou o conselleiro, que permite manter unha conexión directa cos sectores empresariais, garante a óptima formación do alumnado en certos módulos profesionais e contribúe á actualización dos currículos formativos.
A este respecto, Galicia solicita que a incorporación destes expertos á docencia en centros educativos non estea condicionada a que non existan outros docentes dispoñibles, que se regule con máis claridade o sistema de selección destas persoas e que se especifique cal é a modalidade contractual, entre outras cuestións.
Tivo lugar o acto de entrega dos Premios de Responsabilidade Social Empresarial de Galicia 2026, que puxeron en valor a importancia de promover unha cultura empresarial que integre a responsabilidade social no seu modelo de xestión e sitúe as persoas no centro da actividade. As entidades premiadas foron Galaica Consultaría Integral e Nasas Social Media, na categoría de pequena empresa; Torres y Sáez, na de mediana empresa; Citanias Obras y Servicios, na de grande empresa; e Altia, coa Mención á Conciliación.
A conselleira do Mar, Marta Villaverde, defenderá ante o Goberno central a posición de Galicia sobre o futuro da Política Pesqueira Común, baseada na necesidade de garantir financiamento suficiente para o sector, facilitar a renovación e modernización da frota e avanzar cara a un modelo de xestión que teña en conta tanto a conservación dos recursos como a viabilidade económica e social da actividade. Villaverde trasladará que Galicia afronta este debate desde unha posición singular pola dimensión e diversidade do seu complexo mar-industria, cunha extensa frota de baixura e pequena escala, unha importante presenza da altura e gran altura, unha industria transformadora e conserveira de referencia e unha acuicultura cun destacado peso na produción comunitaria.
