viernes, 9 de octubre de 2026
O Museo das Peregrinacións de Santiago de Compostela foi hoxe o escenario da presentación da comedia Códice-K, a nova achega escénica que Ainé Producións estreará o venres 24 ás 20,30 h. no Teatro Principal, onde poderá verse tamén o sábado 25 á mesma hora. A Xunta subvenciona este espectáculo cunha achega de preto de 44.000 euros a través da convocatoria de axudas á creación escénica de 2022, que distribuíu 800.000 euros entre 28 montaxes de teatro, danza e novo circo.
Ao tempo que contribúe economicamente á súa produción, a Consellería de Cultura, Educación, FP e Universidades colabora na estrea de Códice-K ao abeiro da Rede Galega de Teatros e Auditorios, circuíto de espectáculos cofinanciado xunto a 40 entidades locais das catro provincias e do que forma parte o Teatro Principal de Santiago.
Así o explicou hoxe o director da Axencia Galega das Industrias Culturais, Jacobo Sutil, que aproveitou a súa intervención nesta presentación para felicitar o equipo de Ainé pola súa nova proposta tras a estrea e a xira de Recortes, caneos e outras formas de driblar, producida co Centro Dramático Galego.
Música en directo
Tito Asorey e Noemi Rodríguez dirixen esta intrahistoria extra oficial sobre o roubo do Códice Calixtino na catedral compostelá a partir dun texto de Manuel Cortés. As actrices Lucía Veiga, Marita Martínez, Graciela Carlos e Patricia Castrillón meteranse na pel de múltiples personaxes para ofrecer moi diferentes puntos de vista sobre esta historia. Ademais, unha DJ dará cobertura sonora e dramática á súa posta en escena.
Completan o equipo artístico Banale (escenografía) Russ (espazo sonoro), Laura Iturralde (iluminación), Laura Baena (vestiario) e Laura Mahí (deseño da imaxe).
As entradas para as dúas representacións de Santiago poden adquirirse a través da plataforma www.compostelacultura.gal e na Zona C (praza de Cervantes) de martes a sábado, no seu horario habitual.
Outras estreas na rede
Neste primeiro semestre do ano, a Rede Galega de Teatros e Auditorios estalle a ofrecer ao público compostelán unha escolma da máis actual produción teatral galega da man das cinco compañías programadas no Principal a través deste circuíto. Así, o escenario da rúa Nova, 21 acolleu xa as estreas de Pussy Cake, de Matarile Teatro, e de Hamelin, de Redrum Teatro, así como as representacións de Vox Populi, de Malasombra; e Pirolíticos, de Mofa & Befa.
Foi presentada a novena edición de Intersección, Festival Internacional de Cine da Coruña, celebrada nos Cantones Cines. O festival desenvolverase do 13 ao 17 de outubro cunha programación que combina proxeccións, exposicións, formación e encontros profesionais arredor das novas linguaxes cinematográficas. Así, as seccións competitivas Galicia, Internacional e Fulgor achegarán ao público obras afastadas dos circuítos comerciais habituais e novas voces da creación audiovisual contemporánea. En concreto, a sección Internacional reúne 27 filmes procedentes de 22 países, entre os que figuran catro estreas mundiais, 17 en España e cinco en Galicia. As propostas exploran cuestións como a tecnoloxía, a memoria, o territorio e a identidade desde linguaxes e xeografías diversas.
A Real Academia Galega de Ciencias (RAGC) celebrou en Santiago, no Salón Nobre do Colexio de Fonseca, o acto do Día da Ciencia en Galicia, no que se homenaxeou á oceanógrafa Aida Fernández Ríos (Vigo, 1947 - Moaña, 2015) como Científica Galega 2026. Ademais, entregáronse as Medallas de Investigación a cinco científicas e científicos da nosa comunidade. O presidente da Academia destacou que 'Aida Fernández Ríos foi unha investigadora capaz de identificar problemas relevantes e de situalos nun contexto internacional, converténdose nunha científica respectada moito máis alá de Galicia.
