lunes, 7 de julio de 2025
O Centro de Novas Tecnoloxías de Galicia (CNTG) iniciou xa a programación formativa deseñada para o primeiro semestre deste ano coa que a Xunta de Galicia ofrece un total de 1.000 prazas de cualificación certificada e especializada a través de 47 cursos, así como a organización de 39 xornadas técnicas centradas na innovación e o sector tecnolóxico.
A formación que se imparte neste centro, que depende da Consellería de Promoción do Emprego e Igualdade, vai en liña coa aposta que está a facer o Goberno galego para formar a persoas demandantes de emprego e traballadoras nos sectores nos que na actualidade existen vacantes laborais.
Os 47 cursos están a impartirse nas modalidades presencial, virtual e de teleformación e, ao seu remate, as alumnas e alumnos teñen a opción de recibir unha certificación, tanto as persoas desempregadas inscritas no Servizo Público de Emprego de Galicia como as persoas traballadoras nun centro emprazado en Galicia.
A través destas accións ofértanse formacións que permiten a persoas desempregadas e ocupadas doutros sectores obter novas cualificacións para incorporarse ao mercado laboral no sector tecnolóxico, como é o caso dos cursos de Introdución a Java e de Introdución a bases de datos relacionais. Tamén impártense cursos especializados sobre xestión de solucións na nube; de xestión avanzada de redes; de administración de sistemas; de análise e ciencia da datos; de organización, metodoloxía e xestión áxil de proxectos; ou de programación en linguaxes innovadoras.
Con respecto ás xornadas, comezaron o pasado día 22 cunha sesión impartida polo experto en ciberseguridade de CISCO, profesor da Universidade da Coruña e coordinador do máster de Ciberseguridade, Francisco Javier Novoa, que versou sobre como deseñar un acceso a Internet tolerante a fallos nas redes corporativas das organizacións.
Esta primeira xornada terá continuidade na semana do 6 de marzo con 3 novas charlas, que versarán sobre o deseño escalable de redes; as novidades das linguaxes de programación máis usadas, Java; e as posibilidades das linguaxes de programación con máis potencial na análise de datos, Python.
As 39 xornadas que se desenvolverán ao longo deste primeiro semestre terán lugar de xeito presencial, en horario de tarde e achegarán dun xeito práctico temáticas tan innovadoras e tan de releve no mundo tecnolóxico como as solucións na nube, o deseño seguro de redes, a ciencia de datos, os sistemas de análise de datos e axuda a toma de decisións, a intelixencia artificial ou as novidades nas linguaxes de programación máis empregadas.
As xornadas son gratuítas para os asistentes, que reciben ao finalizar a sesión unha certificación de asistencia, coa duración e o contido da formación recibida.
A formación que se imparte no Centro de Novas Tecnoloxías de Galicia conta cun alto recoñecemento entre as empresas e os traballadores do sector tecnolóxico, e cunha alta demanda, que está a superar en cinco veces a oferta de prazas. Na liña de atender dita demanda, o CNTG está a traballar no deseño e programación dunha oferta para o período 2023/2024 que atenda de xeito satisfactorio as demandas formativas do ecosistema empresarial TIC galego.
EuroPCom, a Conferencia Europea de Comunicación Pública, é a maior reunión anual de expertos en comunicación pública de Europa organizada polo Comité Europeo das Rexións en colaboración coa Comisión Europea, o Parlamento Europeo, o Consello, o Banco Europeo de Investimentos, o Comité Económico e Social Europeo e a Organización para a Cooperación e o Desenvolvemento Económicos. O evento ofrece unha plataforma para explorar as últimas tendencias, iniciativas e ideas no ámbito da comunicación pública. O director xeral de Relacións Exteriores e coa Unión Europea, Jesús Gamallo, participou nesta Conferencia organizada polo Comité Europeo das Rexións, e celebrada baixo o lema 'Máis alá das palabras. Unha historia de confianza'.
O Diario Oficial de Galicia publica hoxe a declaración de Ben de Interese Cultural da Rapa das Bestas de Sabucedo por considerar acreditado o seu valor sobranceiro como patrimonio inmaterial do pobo galego, ao tratarse dunha das festas máis antigas de Galicia que conta, como mínimo, con tres séculos de historia. Este recoñecemento supón a aplicación de inmediato do réxime de tutela da Lei de Patrimonio Cultural e, polo tanto, o maior nivel de protección. Esta distinción, que se suma á de Festa de Interese Turístico Internacional acadada en 2007, chega tras o visto e prace a este decreto por parte do Consello da Xunta este pasado luns, 30 de xullo, e logo de completarse o expediente administrativo, no que constan os dous informes preceptivos dos órganos consultivos favorables.
