viernes, 18 de septiembre de 2026
O presidente da Xunta, Alfonso Rueda, enxalzou hoxe a potencia do Sistema Universitario de Galicia, vencellada ao talento do alumnado, ao bo facer do persoal docente e tamén ao importante apoio do Goberno galego, tal e como considerou que reflicten os case 500 millóns de euros de financiamento para este 2023, o que supón o ano con máis recursos públicos.
Así o puxo en valor na entrega en Santiago dos Premios Excelencia Académica a 434 estudantes universitarios galegos, aos que lle deu os parabéns polo seu esforzo para acadar as mellores cualificacións nos seus respectivos cursos e titulacións. Aquí non vale máis o que máis ten, senón o que máis sabe, e para iso hai que esforzarse moito, aseverou, ao tempo que advertiu que o esforzo non está pasado de moda nin o vai estar nunca.
Ademais deste esforzo por parte do alumnado, Rueda tamén salientou o apoio da Administración galega para que calquera mozo que decida estudar unha carreira universitaria o teña máis fácil e referiuse, en concreto, ao feito de Galicia é a única comunidade que mantén conxelados desde hai doce cursos os prezos públicos das matrículas universitarias.
Nesta liña, amosou a aposta e compromiso do Goberno galego por que todos aqueles estudantes que rematen a súa carreira poidan quedarse en Galicia se así o deciden. En Galicia fai falta moito talento e vós representades o talento por excelencia, subliñou.
Neste eido, o mandatario galego considerou importante seguir incidindo en que a formación e os graos universitarios que se oferten estean en total conexión co que demanda o mercado para que ,ao rematar á carreira, se poida ofrecer un futuro laboral. Necesitámosvos a todos, apuntoulles ás e aos estudantes premiados, ao tempo que concluíu que con xente coma vós, Galicia vai ter futuro durante moito tempo.
Tivo lugar o acto de entrega dos Premios de Responsabilidade Social Empresarial de Galicia 2026, que puxeron en valor a importancia de promover unha cultura empresarial que integre a responsabilidade social no seu modelo de xestión e sitúe as persoas no centro da actividade. As entidades premiadas foron Galaica Consultaría Integral e Nasas Social Media, na categoría de pequena empresa; Torres y Sáez, na de mediana empresa; Citanias Obras y Servicios, na de grande empresa; e Altia, coa Mención á Conciliación.
A conselleira do Mar, Marta Villaverde, defenderá ante o Goberno central a posición de Galicia sobre o futuro da Política Pesqueira Común, baseada na necesidade de garantir financiamento suficiente para o sector, facilitar a renovación e modernización da frota e avanzar cara a un modelo de xestión que teña en conta tanto a conservación dos recursos como a viabilidade económica e social da actividade. Villaverde trasladará que Galicia afronta este debate desde unha posición singular pola dimensión e diversidade do seu complexo mar-industria, cunha extensa frota de baixura e pequena escala, unha importante presenza da altura e gran altura, unha industria transformadora e conserveira de referencia e unha acuicultura cun destacado peso na produción comunitaria.
