viernes, 18 de septiembre de 2026
A Xunta celebra a confianza e a preferencia da poboación galega pola sanidade pública, tras avaliar os datos do derradeiro barómetro sanitario do Centro de Investigacións Sociolóxicas (CIS), e na que Galicia se sitúa como a segunda comunidade na que maior porcentaxe de poboación elixiría á sanidade pública, para ter unha consulta co médico de cabeceira ou pediatría, cun 76,5% fronte o 68,6% media nacional.
Durante a xuntanza da Comisión 5ª de Sanidade, Política Social e Emprego, que tivo lugar esta mañá no Parlamento de Galicia; a xerente do Servizo Galego de Saúde, Estrella López-Pardo; analizou uns datos que tamén apuntan que Galicia ocupa a segunda posición a nivel nacional, na porcentaxe da cidadanía elixiría a sanidade pública para un ingreso hospitalario (84,2% fronte ao 75,2% de media nacional).
Os galegos confían plenamente no sistema sanitario público de Galicia, sendo a cidadanía de toda España que máis opta pola sanidade pública, salientou López-Pardo, que lembrou tamén que as porcentaxes de preferencia pola sanidade pública nos seus distintos ámbitos son superiores ás que reflectía o barómetro sanitario en 2008.
Galicia entre as comunidades con menos seguros privados
Durante a súa intervención, López-Pardo analizou tamén os datos do informe realizado pola Unión Española de Entidades Aseguradoras (UNESPA), que agrupa ás entidades aseguradoras de España e representa ao 96% do mercado nacional.
Segundo esta análise, abundou a xerente do Sergas, a penetración do seguro privado sanitario en Galicia é dun 16,6% , case 8 puntos porcentuais por debaixo da media de España, que se atopa no 24,4%.
Neste sentido incidiu en que pasamos de estar na metade superior das comunidades autónomas en porcentaxe de poboación con seguro privado en 2008, a estar na metade inferior neste momentos.
Na mesma liña, e sobre o incremento xeneralizado dos seguros privados en toda España nos últimos cinco anos, a xerente do Sergas precisou que mentres en Galicia houbo un aumento de algo menos de 2 puntos; no conxunto de España este incremento ascende case ata os 4 puntos.
López-Pardo pechou a súa intervención subliñando que a confianza no sistema sanitario público é froito de mesturar durante os últimos anos, o traballo e esforzo do conxunto de profesionais do Servizo Galego de Saúde, cos incrementos orzamentarios que a Xunta está a realizar no conxunto de centros sanitarios galegos para achegar un servizo asistencial de calidade.
Tivo lugar o acto de entrega dos Premios de Responsabilidade Social Empresarial de Galicia 2026, que puxeron en valor a importancia de promover unha cultura empresarial que integre a responsabilidade social no seu modelo de xestión e sitúe as persoas no centro da actividade. As entidades premiadas foron Galaica Consultaría Integral e Nasas Social Media, na categoría de pequena empresa; Torres y Sáez, na de mediana empresa; Citanias Obras y Servicios, na de grande empresa; e Altia, coa Mención á Conciliación.
A conselleira do Mar, Marta Villaverde, defenderá ante o Goberno central a posición de Galicia sobre o futuro da Política Pesqueira Común, baseada na necesidade de garantir financiamento suficiente para o sector, facilitar a renovación e modernización da frota e avanzar cara a un modelo de xestión que teña en conta tanto a conservación dos recursos como a viabilidade económica e social da actividade. Villaverde trasladará que Galicia afronta este debate desde unha posición singular pola dimensión e diversidade do seu complexo mar-industria, cunha extensa frota de baixura e pequena escala, unha importante presenza da altura e gran altura, unha industria transformadora e conserveira de referencia e unha acuicultura cun destacado peso na produción comunitaria.
