sábado, 7 de noviembre de 2026
Nos centros xestionados pola Xunta de Galicia relizáronse preto de 750.000 préstamos, o que supón un incremento do 5,6 % en relación ao ano 2021. Así, segundo estes datos, en 2022 rexistráronse case 40.000 préstamos máis que no anterior exercicio nos centros Miguel González Garcés da Coruña, Lugo, Nós de Ourense, Antonio Odriozola de Pontevedra, Ánxel Casal de Santiago de Compostela e Juan Compañel de Vigo.
Á cifra de préstamos realizados de xeito presencial súmanse os case 135.000 feitos a través de GaliciaLe, a plataforma de préstamo de libros, revistas, audiolibros e películas en formato electrónico das bibliotecas públicas galegas. Esta ferramenta, que ten por obxectivo facilitar o acceso de toda a cidadanía á cultura, consolida así o crecemento que está a vivir nos últimos anos ao incrementarse esta cifra en 22.000 préstamos en relación ao pasado ano e nun 60 % co período anterior á pandemia.
Títulos máis demandados
Os títulos galegos máis demandados en 2022 nas nosas bibliotecas foron Os Bolechas, de Pepe Carreiro, Leo con Bubela, de Colectivo Bubela, e O souto dos catro ventos, de María Oruña. Completan as primeiras posicións as obras Os nenos da varíola, de María Solar, autora galardoada co Premio Xerais o pasado ano,e A praia dos afogados do autor Domingo Villar falecido en maio.
En canto aos libros en castelán, os máis solicitados polos usuarios foron La bestia, coa que Carmen Mola gañou o Premio Planeta en 2021, La madre de Frankenstein, de Almudena Grandes, e Una historia ridícula, de Luis Landero, que obtivo o Premio Nacional de las Letras Españolas o pasado ano. Corazón tan blanco, do autor Javier Marías, falecido en setembro, e La señora March, de Virgina Feito, completan a listaxe dos títulos máis demandados.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
