sábado, 20 de junio de 2026
A conselleira salientou que esas tarifas van permanecer conxeladas no ano 2023 porque o Goberno galego considerou necesario realizar un especial esforzo de acompañamento ás familias nun momento economicamente complexo.
Lembrou que xa o pasado ano, cando o IPC obrigaba a aplicar unha suba do 5% nas autoestradas autonómicas, a Xunta decidiu que se aplicaría só a metade do incremento, facéndose cargo a Administración autonómica do resto da achega económica.
Agora, cunha situación máis difícil para os galegos, Ethel Vázquez sinalou que a Xunta aposta por responder con medidas excepcionais a situacións excepcionais e redobra o esforzo, conxelando as peaxes para evitar unha actualización de tarifas do 7%.
Segundo afirmou, o Goberno galego apostou pola anticipación e a planificación, reservando nos Orzamentos do ano 2023 unha partida de 4,8 M que fará posible que as tarifas das autoestradas autonómicas non suban e se manteñan as bonificacións existentes.
En concreto, a conselleira indicou que o convenio asinado hoxe recolle unha achega de 2 M para manter conxeladas as peaxes e evitar así que os 26.500 usuarios diarios das autoestradas autonómicas afronten esa suba do 7%.
O convenio blinda tamén o mantemento durante o vindeiro exercicio das diferentes bonificacións que se veñen aplicando sobre as súas peaxes da Xunta desde hai anos. Trátase de descontos do 25% na 1ª viaxe de volta e do 50% a partir da segunda volta; do 50% nas viaxes nocturnas; e do 100% da viaxe de retorno para as familias numerosas.
Ethel Vázquez explicou que a tradución práctica da conxelación de tarifas e das bonificacións para usuarios recorrentes nas autoestradas autonómicas é que un usuario habitual da autoestrada Vigo-Baiona aforre uns 200 euros no ano 2023, unha cifra que se eleva ata os 300 no caso do percorrido A Coruña-Carballo. No caso de que sexan viaxes nocturnas ou as realicen membros de familias numerosas, o aforro verase incrementado.
A titular de Infraestruturas e Mobilidade subliñou que con este convenio asinado hoxe, as autoestradas da Xunta seguirán a estar entre as máis baratas de España. Fronte a isto, sinalou a inaceptable decisión do Goberno de España de autorizar unha suba de peaxes do 4% nas tarifas da AP-9 e da AP-53 a partir do día 1 de xaneiro.
Sinalou que os galegos volven así atoparse con que teñen que pagar máis por circular pola principal vía de comunicación da Comunidade, a autoestrada AP-9, na que a peaxe leva subindo de forma extraordinaria máis de 4 anos, volvendo a encarecerse agora de xeito moi notable.
E, engadiu, que o mesmo sucede na AP-53, Santiago-Dozón, co agravante, neste caso, de que se trata da única autoestrada estatal na que non se aplica ningunha bonificación ao usuario.
A conselleira incidiu en que é unha pésima noticia para Galicia a decisión final do Goberno de España de non seguir o camiño da Xunta, conxelando as peaxes das autoestradas estatais, polo que os galegos afrontarán o domingo unha nova suba do 4% nas peaxes da AP-9 e da AP-53.
O programa formativo Medrando Xuntas permitiu que as mulleres participantes traballasen habilidades clave como a comunicación, a organización, o liderado, a toma de decisións, a participación interna e a mellora da confianza profesional, ao tempo que se fomentou a creación dunha rede de mulleres que se apoian, colaboran e comparten recursos e que se deron a coñecer proxectos que están a transformar a economía. En primeiro lugar, Medrando Xuntas contou cun programa formativo para reforzar a súa participación nas entidades de economía social. En segundo lugar, a formación para directivas estaba dirixida a mulleres con responsabilidades de dirección ou proxección cara ao liderado.
Unha alianza entre o Instituto Tecnolóxico de Galicia (ITG) e as compañías Naturgy InnovaHub e Flythings Technologies desenvolverá unha plataforma enerxética que transformará residuos en produtos de alto valor engadido. Neste caso transformaranse residuos como lodos de depuradora, restos orgánicos e biomasas, en produtos de alto valor engadido como biocombustibles (hidrochar e biometano) e vectores enerxéticos sostibles (hidróxeno e syngas). Para iso, a nova unidade mixta combinará distintas tecnoloxías e incorporará sistemas híbridos de almacenamento con baterías e supercondensadores, ademais de empregar ferramentas como Internet das cousas, os xemelgos dixitais e a aprendizaxe automática.
