lunes, 21 de septiembre de 2026
O secretario xeral de Política Lingüística, Valentín García, participou este serán na presentación do volume 100 anos do Día de Galicia, da historiadora Gemma Rodríguez Alonso. No libro, que ve a luz con motivo do centenario da instauración deste día por parte das Irmandades da Fala, a autora investiga por primeira vez o proceso de construción identitaria a través dos actos que concirnen o Día de Galicia, considerado pola maioría dos historiadores símbolo nacional.
O representante da Consellería de Cultura, Educación, FP e Universidades, destacou a importancia de documentar a longa traxectoria dos nosos símbolos e efemérides para divulgalas e dalas a coñecer desde a perspectiva da nosa lingua e cultura.
No acto, que acolleu o compostelán Pazo de San Roque, tamén interviñeron Belén Fortes, responsable de Guiverny, editorial que publica o volume, e Gemma Rodríguez Alonso, autora.
Centenario do Día de Galicia
A mediados do século XIX e durante o primeiro terzo do XX, os pais do Rexurdimento, os integrantes das Irmandades da Fala, os intelectuais da Xeración Nós e os exiliados republicanos galegos en América comezaron a construír e imaxinar un novo concepto de Galicia. Neste contexto, as Irmandades estableceron en 1919 que o Día de Galicia se celebraría, a partir do ano seguinte, cada 25 de xullo.
A efeméride adquiriu oficialidade coa publicación do Decreto do 1 de xaneiro de 1979 da Xunta de Galicia polo que se declara Día Nacional de Galicia o día 25 de xullo de cada ano.
100 anos do Día de Galicia aborda desde varias perspectivas aspectos relativos a esta festividade tales como a súa orixe, historia e evolución cunha detallada documentación dos actos institucionais realizados para celebrar esta data en Galicia. Dividido en dúas partes, realiza un percorrido histórico, respondendo a unha serie de cuestións relacionadas coa representación oficial da identidade galega. A primeira delas abrangue desde o ano 1919 ata o golpe militar de 1936, mentres que a segunda vai desde 1978 ata o 2020, centrándose nos diferentes actos de celebración do 25 de xullo, como a imposición das Medalla de Galicia, organizadas pola propia Xunta, ou a misa en memoria de Rosalía de Castro, promovida por distintas fundacións.
Gemma Rodríguez Alonso é licenciada en Historia Contemporánea, con grao en Protocolo e Organización de Eventos pola Universidad del Atlántico Medio. Desde hai 28 anos traballa como asesora técnica do Departamento de Protocolo da Xunta de Galicia. Ademais, participou na execución de numerosos actos da misa rosaliana e, desde 1993, nas edicións das Medallas de Galicia.
O Consello da Xunta analizou na súa reunión de hoxe un informe da Consellería do Medio Rural sobre o anteproxecto de Lei de loita contra os incendios forestais de Galicia (LLCIF), antes da súa remisión para consulta ao Consello Forestal de Galicia, cuxa reunión está prevista para mañá martes. A futura normativa prioriza reforzar a protección da poboación e a xestión integral do territorio. O presidente do Goberno autonómico, Alfonso Rueda, lembrou que actual lexislación sobre incendios forestais 'ten case 20 anos' e 'cómpre actualizarla e adaptala aos novos tipos de lumes así como aos avances que houbo tanto na loita como na prevención de incendios'.
Galicia é a rexión que máis solicitudes presentou en Europa para participar en proxectos interrexionais de I+D+i. Así o indican os datos da Vanguard Initiative, alianza europea da que a nosa Comunidade forma parte, xunto a outras rexións, para estimular o crecemento europeo da I+D+i a través da colaboración entre territorios de distintos países e a especialización intelixente. Precisamente a Xunta vén de publicar a convocatoria VInnovate Galicia, unha liña de axudas para organismos de investigación e empresas que presenten proxectos con outras rexións. Para poder candidatar á convocatoria VInnovate Galicia da Xunta, cuxo prazo de presentación de propostas está aberto desde hoxe ata o 19 de outubro, os posibles participantes teñen que presentarse antes á fase europea.
