martes, 30 de abril de 2024
O director xeral de Cultura, Anxo M. Lorenzo, participou na entrega hoxe do VIII Premio Literario Nortear para mozos da Eurorrexión GaliciaNorte de Portugal a Marta Pais de Oliveira. O certame, apoiado pola Xunta de Galicia e a Dirección Rexional de Cultura do Norte de Portugal, ten como obxectivo incentivar a produción literaria entre os novos escritores que viven na zona transfronteiriza.
O representante da Consellería de Cultura, Educación, FP e Universidades destacou o valor de Nortear, un proxecto de intercambio cultural que ten como eixo a promoción da creación artística entre Galicia e Portugal. Con esta iniciativa buscamos fortalecer as xa moi frutíferas relacións entre ambas culturas, incrementando as redes colaborativas, grazas ao impulso de diversas actividades como este certame ou a residencia artística anual que desenvolvemos na Illa de San Simón, sinalou.
O galardón ten unha dotación de 3.000 e contempla a publicación da obra vencedora en galego e portugués, nesta edición cunha portada obra do ilustrador coruñés David Pintor. Nas anteriores edicións acadaron o premio Lara Dopazo, Rui Cerqueira Coelho, Cecília Santomé, Sara Brandão, Sabela Varela, Célia Fraga e Pedro Rodríguez Villar.
No acto de entrega do premio participou tamén o director da Agrupación Europea de Cooperación Territorial da Eurorrexión GaliciaNorte de Portugal, Nuno Almeira, e a directora Rexional de Cultura do Norte de Portugal, Laura Castro, entre outras autoridades.
Un total de 40 participantes
O conto breve Medula foi a obra coa que Marta Pais de Oliveira se fixo co premio desta oitava edición do certame, á que presentaron orixinais un total de 40 escritores mozos. Trátase dunha distopía que aborda a historia de dúas persoas que están ás portas do Ministerio da Soidade e precisan decidir o que van facer a continuación.
O xurado destacou a mestría da autora na construción da narrativa e a súa linguaxe e estilo, que coinciden co estado de desasosego permanente que acompañan toda a estrutura interna da narrativa.
Natural de Vila Nova de Gaia, Marta Pais de Oliveira é licenciada en Ciencias da Comunicación pola Universidade do Porto e a Universidade Complutense de Madrid e ten un posgrao en Comunicación Empresarial pola Porto Business School. É tamén gañadora do Premio Revelación Agustina Bessa-Luís 2020 coa súa novela Escavadoras.
O director xeral de Relacións Exteriores e coa UE, Jesús Gamallo, reuniuse esta mañá cos responsables da AECT Rio Minho para coñecer de primeira man as prioridades e os proxectos que ten en marcha este instrumento de cooperación que abrangue 16 concellos da provincia de Pontevedra e 10 da CIM Alto Minho. Esta é unha primeira visita que o director xeral de Relacións Exteriores e coa UE, Jesús Gamallo, continuará co resto de AECTs. Deste xeito, está previsto que se entreviste tamén cos responsables da AECT Chaves-Verín, e da futura AECT da Raia Seca.
A Cidade da Cultura volve acoller a colorida e festiva carreira Holi Gaiás, que vai pola súa sexta edición. A proba terá lugar o sábado 8 de xuño nos exteriores do complexo e nesta ocasión contará cun percorrido especial para a cativada entre 4 e 9 anos, a Peque Holi. A actividade lúdico festiva contará un ano máis coa súa tradicional poeira de cores e con animación previa e posterior á proba, con música e coreografías que animarán aos participantes durante a mañá. A carreira celébrase co obxectivo de gozar coa práctica deportiva nun enclave singular como é o Gaiás, coa súa característica arquitectura e co seu gran pulmón verde, o Bosque de Galicia. Está artellada co ánimo de que os participantes o pasen ben durante o percorrido e no fin de festa.
