lunes, 21 de septiembre de 2026
En canto ao turismo internacional (19% do total), os 2,1 millóns de noites acadadas entre xaneiro e agosto de este ano triplican os valores do ano pasado, e supoñen igualmente un fito non acadado anteriormente, grazas sobre todo ao comportamento rexistrado nas temporadas media e alta, e a achega realizada polos albergues, unhas 443.000 pernoitas. Todos os mercados internacionais superan as cifras de 2021, e tres deles melloran as de 2019: trátase dos EUA (28%), Portugal (10%) e Francia (2%). Portugal consolídase como o principal punto de orixe do turismo internacional, cun 25% do total.
En canto aos principais destinos turísticos, destacan as Rías Baixas no verán, con preto de 1,3 millóns de noites en hoteis, e en xeral o Camiño de Santiago, que con máis de 436.000 compostelas ata decembro bate tamén todos os récords históricos.
Son datos do balance turístico deste verán, presentado polo Consello da Xunta, e que expón como principais causas deste éxito a prolongación do Ano Xacobeo ata 2022, e a oferta de turismo natural e non masificado que propón Galicia.
Datos por tipoloxía de establecemento
Todos os tipos de establecementos turísticos conseguiron superar a demanda do ano 2021, tanto os establecementos hoteleiros, cunha cota de mercado do 62%, como o segmento extra hoteleiro (apartamentos turísticos, cámpings, establecementos de turismo rural e albergues), que supón o restante 38%. Mención aparte merecen os albergues, que superan nun 74% os datos do ano pasado.
Datos por territorios
Todos os xeodestinos da nosa comunidade superan en maior ou menos medida os datos do ano pasado, agás dous: A Ribeira Sacra e Manzaneda-Trevinca. Polo demais, destaca o comportamento das Rías Baixas con preto de 1,3 millóns de noites no segmento hoteleiro, o sub-destino Arousa Norte con 720.000 noites, Terras de Santiago que supera nun 24% os datos de 2021, a Costa da Morte e Ferrolterra con incrementos que superan o 20%, ou A Coruña-As Mariñas cun 15% de suba.
Se falamos das cidades galegas, Santiago e Pontevedra melloran as súas cifras respecto do ano pasado, Vigo mellora tamén aínda que o incremento é menor, e Ourense mantén o nivel de 2021.
Os Camiños de Santiago
Os Camiños de Santiago non son alleos a este éxito do sector turístico na nosa comunidade. A cifra xeral de peregrinos acadou máis de 436.000 compostelas ata decembro, e superou amplamente os datos de 2019, récord histórico ata este ano.
Deste total, un 54,63% corresponde a cidadáns españois e o resto a peregrinos internacionais. Os principais países de orixe serían, por este orde, Italia, Alemaña, EUA, Portugal e Francia.
Se analizamos as distintas rutas a Santiago, o Camiño Francés mantén o primeiro posto cun 51,78 % das compostelas entregadas, pero todas elas melloran os niveis pre-pandemia.
O Consello da Xunta analizou na súa reunión de hoxe un informe da Consellería do Medio Rural sobre o anteproxecto de Lei de loita contra os incendios forestais de Galicia (LLCIF), antes da súa remisión para consulta ao Consello Forestal de Galicia, cuxa reunión está prevista para mañá martes. A futura normativa prioriza reforzar a protección da poboación e a xestión integral do territorio. O presidente do Goberno autonómico, Alfonso Rueda, lembrou que actual lexislación sobre incendios forestais 'ten case 20 anos' e 'cómpre actualizarla e adaptala aos novos tipos de lumes así como aos avances que houbo tanto na loita como na prevención de incendios'.
Galicia é a rexión que máis solicitudes presentou en Europa para participar en proxectos interrexionais de I+D+i. Así o indican os datos da Vanguard Initiative, alianza europea da que a nosa Comunidade forma parte, xunto a outras rexións, para estimular o crecemento europeo da I+D+i a través da colaboración entre territorios de distintos países e a especialización intelixente. Precisamente a Xunta vén de publicar a convocatoria VInnovate Galicia, unha liña de axudas para organismos de investigación e empresas que presenten proxectos con outras rexións. Para poder candidatar á convocatoria VInnovate Galicia da Xunta, cuxo prazo de presentación de propostas está aberto desde hoxe ata o 19 de outubro, os posibles participantes teñen que presentarse antes á fase europea.
