viernes, 18 de septiembre de 2026
A Xunta constata que as chuvias do mes de novembro permiten superar a situación de prealerta por escaseza de auga en toda a Demarcación Hidrográfica Galicia-Costa.
A directora de Augas de Galicia, Teresa Gutiérrez, presidiu hoxe unha nova xuntanza da Oficina Técnica da Seca, na que participan tamén Protección Civil, Meteogalicia e a Consellería do Medio Rural, na que se confirmaron as expectativas de melloría dos indicadores de seca prolongada e de escaseza conxuntural.
Seguindo o establecido no Plan de seca de Galicia-Costa, na xuntanza de hoxe avaliouse a situación, dunha banda, en función das precipitacións rexistradas e, doutra banda, en función das reservas de auga dispoñibles para o abastecemento.
As precipitacións rexistradas no conxunto da comunidade no mes de novembro foron un 50% superiores aos valores medios, e as previsións para o mes de decembro apuntan á normalidade, sendo este mes o máis chuvioso do ano no clima galego.
En relación coas reservas de auga dispoñibles de abastecemento, na xuntanza de hoxe confirmouse que a evolución dos caudais dos ríos, ademais de manterse, experimentaron unha importante melloría.
No que se refire á auga embalsada, o nivel actual dos encoros de abastecemento da demarcación Galicia-Costa, de competencia da Xunta, sitúase no 74,3%, cunha ocupación superior de case 4,4 puntos, con respecto á rexistrada no mesmo período do ano anterior.
Estes valores permiten a saída da situación de escaseza por seca, un nivel de risco de abastecemento que se supera, acadándose a normalidade en toda a demarcación de Galicia-Costa. En concreto, a finais de novembro o sistema do río Mero, Arteixo e ría da Coruña recuperaba os niveis que lle permitiron saír do escenario de prealerta por escaseza. O nivel de ocupación do encoro de Cecebre xa se atopa case ao 63%.
Tamén pasan á normalidade os subsistemas de Baiona e Zamáns, no sistema de explotación do río Verdugo, Ría de Vigo e Ría de Baiona, confirmándose a última valoración da Oficina Técnica da Seca. Os encoros de Zamáns e de Baiona están ao 91,3% e o ao 92,8%; respectivamente. Estes encoros abastecen aos concellos de Nigrán e de Baiona, ademais de a unha parte do concello de Vigo.
Doutra banda, á vista dos indicadores e á melloría da situación rexistrada, no encontro de hoxe determinouse a desactivación da declaración de estado de seca prolongada a 8 novos sistemas de Galicia-Costa, que xa tiña acadado o sistema da Mariña luguesa e na zona de Ortegal e Cedeira.
Deste xeito, os novos sistemas, que pasan a situación de completa normalidade, son: río Verdugo, Ría de Vigo e Ría de Baiona; Costa de Pontevedra; río Lérez e Ría de Pontevedra; río Umia e Ría de Arousa (marxe esquerda); Xallas, Costa da Coruña e Ría de Corcubión; río Castro; río Grande, Ría de Camariñas e costa da Coruña ata o límite de Arteixo; e río Anllóns, costa da Coruña ata límite de Arteixo. No resto dos sistemas de Galicia-Costa mantense a seca prolongada, á espera da consolidación dos bos indicadores favorables.
Medio milleiro de investigadoras e investigadores e máis de 150 actividades científicas nas sete cidades galegas: Vigo, Ourense, Pontevedra, Santiago, A Coruña, Ferrol e Lugo. Así se celebrará en Galicia a sexta edición da Noite Galega das Persoas Investigadoras, G-Night 2026, unha actividade na que a comunidade científica galega une talento e esforzos co obxectivo de achegar a ciencia á cidadanía e espertar vocacións científicas, ao tempo que se ofrecen propostas de lecer científico, cultural e educativo para toda a familia.
A Xunta de Galicia reclama ao Goberno central medidas estruturais de apoio ao sector agrogandeiro. Do mesmo xeito, esíxese que se teña en conta a realidade de cada territorio á hora de levar a cabo estas actuacións, que deben executarse de xeito urxente. Así o trasladou a conselleira do Medio Rural, María José Gómez, na Conferencia Sectorial celebrada en Madrid, na que se dirixiu ao ministro de Agricultura, Pesca e Alimentación, Luis Planas, para facer estas reclamacións. Alí, reafirmou tamén o compromiso do Executivo galego con este sector.
