sábado, 7 de noviembre de 2026
Ata o de agora, o 43,44% da poboación pediátrica entre os 6 meses e os 5 anos de idade está vacinada contra a gripe en Galicia. Así o anunciou hoxe o conselleiro de Sanidade en resposta a unha pregunta parlamentaria. Julio García Comesaña destacou a importancia da incorporación ao calendario de vacinación infantil da vacina da gripe, unha importante medida de protección nun ano de alta incidencia de virus respiratorios na infancia, ademais dunha iniciativa pioneira tanto en Galicia como no conxunto de España.
O titular da carteira sanitaria destacou que os resultados de vacinación foron posibles tras o plan piloto posto en marcha pola Consellería de Sanidade no Hospital Clínico de Santiago de Compostela para incrementar os niveis de vacinación da gripe entre a poboación infantil, e evitar cadros máis graves e contaxios. O éxito dese plan levounos a extrapolar esta medida piloto a todas as áreas e empregar os 14 hospitais públicos de Galicia para levar a cabo a vacinación dos nenos entre os 6 meses e os cinco anos. E á vista están os resultados. Só na pasada fin de semana 5.000 nenos e nenas recibiron a vacina contra a gripe nos distintos dispositivos habilitados para elo, -informou o conselleiro de Sanidade-.
Comesaña insistiu en que, dende a Xunta, continuaremos a traballar para que os pais e as nais dos cativos continúen levando aos seus fillos a vacinarse porque non hai mellor remedio que a prevención.
Tamén, o conselleiro explicou a situación extraordinaria que viven estes días as urxencias, tanto as pediátricas como de adultos, a raíz do incremento exponencial de casos de infeccións respiratorias, cun aumento do 65% respecto ao ano pasado debido á maior intensidade de circulación dos virus.
Concretamente, referiuse a alta afluencia rexistrada nas urxencias pediátricas, provocada pola incidencia prematura do virus respiratorio sincital, que xerou máis de 120.000 consultas de pediatría nos centros de saúde nos primeiros 20 días de novembro, case 30.000 consultas máis que no mesmo período en prepandemia.
No caso concreto das urxencias da área sanitaria de Vigo, a activación do plan de continxencia supuxo a ampliación da dotación de persoal adscrito ás urxencias pediátricas, en concreto a incorporación de maneira estable de 5 enfermeiras para facer fronte a este pico asistencial.
Afortunadamente- sinalou García Comesaña- os servizos de urxencias hospitalarias do Sergas teñen o suficiente dimensionamento para resolver a demanda actual, rematou.
A Filmoteca de Galicia pon o foco da súa carteleira para novembro na estrea do ciclo dedicado ao guionista Rafael Azcona no centenario do seu nacemento, unha escolma do cinema do xaponés Keisuke Kinoshita e a visita de James Benning para presentar as súas dúas últimas películas. Coa proxección de El pisito, de Marco Ferreri, comeza esta mesma tarde a Consellería de Cultura, Lingua e Xuventude a conmemoración do centenario de Rafael Azcona, que ata o mes de xaneiro ofrecerá unha escolma representativa da súa dilatada carreira xunto a grandes directores do cinema español. Este mes poderá verse El jardín de las delicias, de Carlos Saura; El anacoreta, de Juan Estelrich, e El año de las luces, de Trueba.
O avance do último informe climatolóxico elaborado por MeteoGalicia indica que a Comunidade rexistrou un mes de outubro cálido e moi seco. Foi un período anómalo, xa que as altas presións foron moito máis frecuentes do que cabería agardar nesta época. De feito, só chegaron tres frontes desde o Atlántico que, ademais, tiveron pouca actividade. Neste contexto, as temperaturas estiveron por riba dos valores climatolóxicos e as precipitacións acumuladas foron moi inferiores ao que cabería agardar. Máis polo miúdo, a media das temperaturas foi superior ao habitual neste mes, sobre todo no caso das máximas, debido ao predominio de situacións anticiclónicas que achegaban aire cálido desde o sur.
