miércoles, 29 de abril de 2026
O proxecto de Orzamentos para 2023 reserva 10 M para iniciar a construción dun centro de Protonterapia en Galicia, que situará a Galicia na vangarda en novos tratamentos contra o cancro e que aspira a ser o primeiro do sistema sanitario público español.
Así o destacou hoxe o conselleiro de Sanidade, Julio García Comesaña, na presentación deste novo centro, nun acto celebrado na Facultade de Física da Universidade de Santiago de Compostela no que estiveron presentes o reitor da USC, Antonio López Díaz, e a decana da Facultade de Física, Elena López Lago, xunto a outros cargos da facultade.
García Comesaña salientou que o novo centro de Protonterapia utilizará unha nova técnica de protóns para radiar tumores e destruír células cancerosas. Esta ferramenta reforza a recentemente presentada Estratexia de xestión do Cancro en Galicia 2022-2028, que aplica medidas para conseguir que cada vez menos persoas enfermen de cancro e se incremente a supervivencia dos que padecen a enfermidade.
A Xunta quere situar a Galicia na vangarda dos tratamentos máis avanzados para combatir e tratar os cancros. Neste sentido, temos dúas novidades que resaltar para os vindeiros anos que farán que Galicia conte cos máis novidosos procedementos no ámbito oncolóxico: un centro de Protonterapia e un centro de Produción de Terapias avanzadas, destacou o conselleiro de Sanidade.
García Comesaña foi máis aló ao sinalar que os orzamentos de 2023 destinan unha partida de 10 M para iniciar a obra do novo centro, que contará cun investimento total de 28,5 M ata 2025. A intención do goberno galego é que, dados os estudos previos feitos sobre o asunto, o centro galego sexa o primeiro de España en poñerse en marcha, remarcou o conselleiro.
Estará emprazado en Santiago de Compostela, e Galicia aspira a ser pioneira en ofrecelo a pacientes da sanidade pública, tanto aos galegos como aos de Castela e León e, previsiblemente, os de Asturias. Trátase dun proxecto moi relevante, tendo en conta que só hai dous hospitais privados en toda España que dispoñen deste tratamento, lembrou o conselleiro.
A Xunta xa comezara a traballar a inicios de 2021 coas universidades galegas a través dun convenio que anunciaba a inclusión dun centro de protonterapia entre os proxectos prioritarios da candidatura galega aos fondos Next Generation.
Neste momento só dous centros privados de España (grupo Quirón Saúde e centro CUN en Madrid) ofrecen esta terapia, e Galicia será o primeiro servizo público en ofrecer este tratamento.
En outubro de 2021 a Xunta participou na sinatura dun convenio na Moncloa a través do que a Fundación Amancio Ortega achegou 280 millóns de euros ao Goberno de España para instalar 10 equipos de protonterapia en todo o Sistema Nacional de Salud, un deles en Galicia.
A Xunta decidiu instalar o seu equipo en Santiago de Compostela, contando xa cun anteproxecto arquitectónico para a construción do centro que o albergará xusto en fronte do hospital clínico, nun novo edificio de arredor de 4.000 m2 que terá conexión co Clínico e co Gil Casares e que dará servizo a toda Galicia.
Beneficios da protonterapia: máis precisión na radiación e menos efectos adversos
A protonterapia é unha modalidade especial de radioterapia que utiliza un feixe de protóns que permiten maior precisión ao impartir a dose de radiación, diminuíndo os efectos adversos en tecidos e órganos sans que rodean o tumor.
A protonterapia demostrou unha alta eficacia e maior seguridade que a radioterapia convencional con fotóns ou electróns. É unha técnica que permite un tratamento moi eficaz de tumores de difícil acceso ou situados en lugares sensibles, cunha altísima precisión que acurta, de maneira moi significativa os tratamentos, e evita, en boa medida, os efectos secundarios doutras técnicas. A protonterapia reduce de forma significativa tratamentos innecesarios en tecidos sans, sendo unha forma eficaz para tumores nos que a radioterapia non resulta efectiva e a cirurxía non é unha opción.
A diferenza da radiación de fotóns tradicional, que usa raios X para atacar o tumor, pero que aplica radiación en tecido san, a terapia de protóns é un tratamento que dirixe protóns cargados positivamente ao tumor, onde depositan a maior parte da dose de radiación. Con esta terapia, a radiación residual é mínima, o que reduce potencialmente os efectos secundarios e o dano ao tecido circundante.
Foron presentadas as xornadas Galicia Biodays, que buscan posicionar Galicia como un territorio de referencia en innovación biotecnolóxica no ámbito internacional. Este evento vaise celebrar os días 6 e 7 de maio no Auditorio Mar de Vigo, e permitirá reforzar a marca Galicia Calidade en biotecnoloxía, fomentar o intercambio de coñecemento e establecer novas colaboracións científicas, empresariais e institucionais. Está previsto que asistan máis de 1000 persoas de 9 biorrexións convidadas, con máis de 130 relatores.
Alfonso Rueda informou de que o Consello deu conta do inicio da tramitación do anteproxecto da que será 'a primeira Lei do terceiro sector da acción social de Galicia'. Unha norma que busca 'unificar nun único texto legal a regulación deste eido e recoñecer de xeito formal o seu traballo e o papel que xogan as entidades na sociedade galega'. A necesidade de aprobar esta lei xustifícase na importante presenza destas entidades en Galicia, preto de 1.500, -que constitúen 'unha auténtica rede de solidariedade', segundo resaltou a conselleira de Política Social e Igualdade, Fabiola García-, para apoiar as persoas e fogares máis vulnerables.
