martes, 22 de septiembre de 2026
A Alianza galega polo clima, impulsada pola Xunta de Galicia o pasado mes de xuño, vén de recibir o recoñecemento como unha das mellores Sustainability Action 2022 de impacto ambiental e social no marco do Sustainability Day 22, unha xornada dedicada a compartir experiencias no eido da sostibilidade.
Durante o acto de entrega de galardóns, a directora xeral de Calidade Ambiental, Sostibilidade e Cambio Climático, Sagrario Pérez, agradeceu que se recoñeza o esforzo que leva a cabo o Goberno galego para que o sector público e privado traballen xuntos cos mesmos obxectivos e a mesma filosofía: deixar unha Galicia mellor ás vindeiras xeracións. Neste sentido, subliñou que os promotores deste premio fixeron unha exhaustiva escolla entre proxectos e iniciativas moi diversas no eido da sustentabilidade.
A Alianza galega polo clima que na actualidade conta xa cunhas 30 entidades inscritas como universidades, autoridades portuarias, empresas e entidades deportivas supón asumir as liñas estratéxicas marcadas polo Goberno galego nesta materia e unha serie de deberes.
Entre eles, cómpre salientar o establecemento de accións dirixidas á adaptación ou mitigación do cambio climático en Galicia; o fomento do intercambio de información científica, tecnolóxica, socioeconómica ou xurídica sobre este tema; a promoción e apoio á investigación vinculada ao clima, e o impulso do desenvolvemento e da difusión de tecnoloxía para a transición cara a sistemas de enerxía de baixas emisións.
O Consello da Xunta analizou na súa reunión de hoxe un informe da Consellería do Medio Rural sobre o anteproxecto de Lei de loita contra os incendios forestais de Galicia (LLCIF), antes da súa remisión para consulta ao Consello Forestal de Galicia, cuxa reunión está prevista para mañá martes. A futura normativa prioriza reforzar a protección da poboación e a xestión integral do territorio. O presidente do Goberno autonómico, Alfonso Rueda, lembrou que actual lexislación sobre incendios forestais 'ten case 20 anos' e 'cómpre actualizarla e adaptala aos novos tipos de lumes así como aos avances que houbo tanto na loita como na prevención de incendios'.
Galicia é a rexión que máis solicitudes presentou en Europa para participar en proxectos interrexionais de I+D+i. Así o indican os datos da Vanguard Initiative, alianza europea da que a nosa Comunidade forma parte, xunto a outras rexións, para estimular o crecemento europeo da I+D+i a través da colaboración entre territorios de distintos países e a especialización intelixente. Precisamente a Xunta vén de publicar a convocatoria VInnovate Galicia, unha liña de axudas para organismos de investigación e empresas que presenten proxectos con outras rexións. Para poder candidatar á convocatoria VInnovate Galicia da Xunta, cuxo prazo de presentación de propostas está aberto desde hoxe ata o 19 de outubro, os posibles participantes teñen que presentarse antes á fase europea.
