sábado, 28 de junio de 2025
O delegado territorial da Xunta na Coruña, Gonzalo Trenor,recibiu aos organizadores do festival Galicia Ilusiona, Dani Polo e Pedro Bugarín, que traerá aos mellores magos do mundo a nosa comunidade entre o 1 de agosto e o 15 outubro.
O delegado da Xunta destacou que estamos ante un proxecto pioneiro, un festival de ilusionismo que abranguerá toda a comunidade autónoma galega e que pretende ser un referente dentro do mundo da maxia.
Os organizadores agradeceron o apoio que recibiron por parte da Xunta de Galicia para facer realidade este proxecto que se inclúe dentro da programación do Xacobeo.
No encontro explicaron algunhas das propostas estrelas do festival como serán as galas de maxia internacionais nas 7 grandes cidades galegas, os retos de maxia extrema en localizacións emblemáticas tamén nas principais cidades da comunidade, os espectáculos de maxia nas unidades de pediatría dos principais hospitais galegos e ademais levarase a cabo unha xira de maxia na rúa con espectáculos en máis de 100 concellos de Galicia.
Na cidade da Coruña o Desafío Extremo terá lugar o 6 de agosto no Parrote e o Gala de Maxia o 10 de setembro en Palexco.
En total terán lugar 220 actuacións con máis de 30 artistas e concretamente, na provincia da Coruña estes espectáculos chegarán a 33 concellos, e na comarca da Coruña, ademais da cidade, aos concellos de Culleredo, Sada, Cambre, Arteixo, Betanzos e Oleiros.
Trenor animou a todos os galegos a descubrir o amplo programa porque teremos a oportunidade de poder ver nos principais teatros de Galicia a mellor calidade posible e os números máis premiados e recoñecidos por ilusionistas de todo o mundo. Para consultar toda a información e compra de entradas en: www.galiciailusiona.es
Galicia reforza por terceiro curso consecutivo o seu liderado na taxa de escolaridade de 0 a 3 anos e achégase ao 65 %, máis de 15 puntos por riba da media de España, segundo os últimos datos oficiais que vén de publicar hoxe o Ministerio de Educación, Formación Profesional e Deportes. Deste xeito, Galicia segue sendo a comunidade autónoma onde máis familias poden acudir a unha escola infantil totalmente gratuíta. As cifras oficiais revelan que Galicia rexistrou no curso 2024-2025 unha taxa do 64,3 % de escolarización, máis de catro puntos por riba do 60,6 % acadado no período anterior. Esta porcentaxe mantén á comunidade ao nivel dos países con maiores índices de benestar en Europa, como Suecia ou Dinamarca.
No marco do Plan de Actuacións da Xunta de Galicia fronte aos posibles efectos das altas temperaturas sobre a saúde, vénse de activar o nivel 1 de alerta a diversas áreas da comunidade autónoma por episodio de calor. Meteogalicia informa que a partir da xornada do venres 27, as altas presións volverán localizarse ao norte da península Ibérica, achegando unha masa de aire moi cálida de orixe norteafricana. Isto fará que as temperaturas experimenten significativos ascensos, tanto nos valores mínimos como nos máximos. Este ascenso de temperaturas comezará a notarse desde ese mesmo día, cando en moitos puntos de Galicia se superarán os 30ºC, e mesmo os 35ºC, en puntos do interior.
