viernes, 10 de julio de 2026
O delegado da Xunta na Coruña, Gonzalo Trenor, participou esta mañá, na presentación do festival Noroeste Estrella Galicia que encherá de boa música á cidade da Coruña entre 10 e o 14 de agosto. Trenor destacou que este festival forma parte do ADN dos coruñeses xa que este ano celebramos a súa 35 edición. Neste senso, subliñou que contaremos con 49 bandas, 51 concertos, 18 dos cales contarán co apoio da Xunta, e 10 escenarios espallados por toda a cidade para darlle un carácter máis universal para chegar a todas as zonas da cidade.
Por iso a Xunta, a través do máis ambicioso Xacobeo xamais vivido, tiña que estar, tamén co Festival Noroeste Estrela Galicia que chega á súa trixésimo quinta edición. Non hai moitos acontecementos musicais en España que poidan presumir de algo semellante. A Xunta quixo que a súa participación nesta cita musical sirva, dalgunha forma, para recuperar e conservar aquel primeiro espírito de apoio e impulso aos artistas locais, destacou Trenor.
Por iso, o Xacobeo cristaliza a súa presenza no Festival Noroeste Estrela Galicia patrocinando a presenza no cartel de: Baiuca e Zahara en Riazor, Dios ke che crew (Santa Margarita), Miguel Costas e Familia Caamagno (Campo da Leña), Néstor Pardo e Alfredo García (Plaza de Azcárraga), Nara is Neus & Sasha Smirnov, Musculo e CRNDS (Fundación Luís Seoane), Uxía Pedreira (Castillo de San Antón), Antonio Placer (Casa Casares Quiroga), Toccoro e Judah (A Cormelana), Festicultores e Brasica Rapa (Pasacalles en Torreiro, Alicia Carrera e Teresa Ferreiro (Escenario Sellier).
Trenor subliñou que apoiamos a presenza de 18 artistas sobre un total de 49, todos eles ―salvo a andaluza Zahara― con denominación de orixe galega. Por tanto, a Xunta de Galicia, a través do Xacobeo, mantén aquel espírito iniciático deste festival de hai 35 anos co seu compoñente de promoción da música local.
O representante do Goberno galego subliñou a novidade de que nesta edición incluirase o peirao de Transatlánticos entre os dez escenarios elixidos para esta edición do Festival, nun paso máis cara a ese anhelo de decenas de miles de coruñeses de abrir á cidade e aos cidadáns o mar polos seus catro puntos cardinais. Coa presenza do Porto, a música envolverá A Coruña durante cinco días nunha sinfonía de estilos e de propostas da que ningún coruñés poderá escapar porque ningún coruñés quererá escapar, apuntou.
Presentouse en Lugo a sexta edición do evento Artesanía de Galicia no Courel, que se celebrará en diferentes localidades de Folgoso do Courel entre os días 5 e 9 de agosto e que incluirá cursos de iniciación con inscrición previa, así como obradoiros gratuítos e abertos ao público. A través desta iniciativa organizada pola Fundación Artesanía de Galicia coa colaboración deste concello lugués e da Fundación Uxío Novoneyra promóvese a presenza dos oficios artesanais nos espazos rurais e reforza a visibilidade da marca Artesanía de Galicia, ao tempo que favorece o achegamento do público ás técnicas tradicionais e aos valores do feito á man.
A creación coreográfica contemporánea chegará este mes a espazos abertos de cinco concellos galegos coa oitava edición de Danza no Camiño. O programa desenvolverá en Ferreira de Pantón, Tui, Ourense, Portomarín e Muxía a súa recta final entre o 12 e o 17 de xullo. Os espectáculos de produción galega terán unha presenza destacada nas dúas primeiras citas do festival en Galicia, nas que actuarán como convidadas as compañías de Julia Laport, Laboratorio Escénico, SóLODOS e Daniel Rodríguez Cía. Estas funcións terán lugar o domingo 12 de xullo na igrexa de Santiago de Castillón, en Ferreira de Pantón (Lugo), e o martes 14 na praza de San Telmo de Tui (Pontevedra), cunha selección de propostas que amosan diferentes linguaxes da danza contemporánea creada desde Galicia.
