miércoles, 12 de agosto de 2026
A Xunta de Galicia continúa a avanzar nos preparativos do Ano Picasso con propostas académicas, audiovisuais e musicais que se sumarán á gran exposición Picasso, blanco no recordo azul. A Coruña 2023 sobre a pegada galega do autor. Así o informou hoxe en Madrid o director xeral de Cultura, Anxo M. Lorenzo, no Comité de Cooperación Interinstitucional do Ano Picasso, o órgano de apoio deste acontecemento que está a trazar a folla de ruta da efeméride.
Na reunión explicou os pasos que está dando Galicia para as conmemoracións do 50 aniversario da morte de Pablo Picasso que teñen como eixo central a exposición na que se continúa avanzando tras pechar colaboracións con centros expositivos, institucións e coleccións de particulares de distintas partes do mundo. Prevese poder contar con máis dun cento de pezas que se exporán no Museo de Belas Artes da Coruña en 2023.
A homenaxe de Galicia a Picasso abordará distintas disciplinas para achegar a súa obra a todos os públicos, expresa o representante da Consellería de Cultura, quen tamén recorda que se afondará na súa relación coa Comunidade galega. Por eso, sobre a exposición se está a artellar un intenso programa de actividades paralelas, das que tamén informou na reunión. En concreto, trabállase na posta en marcha de encontros, conferencias e charlas abertas ao público que contarán coa presenza de especialistas internacionais na obra de Picasso. Afondarase nalgúns aspectos pouco coñecidos da súa traxectoria profesional e tamén sobre a súa etapa en Galicia. Ademais, poranse en marcha ciclos audiovisuais coa proxección de filmes e documentais que permitan coñecer máis sobre o autor, así como actividades musicais e educativas, dirixidas tanto aos escolares como ao público en xeral que incluirán visitas guiadas e obradoiros de pintura.
Os avances na programación son parellos aos da propia exposición, na que o Goberno autonómico traballa coa colaboración de distintos museos, institucións e coleccionistas privados. Recentemente acordouse coa Junta de Andalucía o préstamo da peza Instruments et musique et compotier sur une table, na que o artista malagueño retrata un gaiteiro. É propiedade da fundación belga FABA e actualmente está depositada no Museo Picasso de Málaga.
Como expresou, a intención é a de divulgar a etapa galega de Picasso, quizáis unha das máis descoñecidas, do xeito máis completo posible. Picasso, blanco no recordo azul. A Coruña 2023 poderá verse no Museo de Belas Artes da Coruña e enmárcanse nos actos que se celebrarán en 2023 con motivo do 50 aniversario da morte de Picasso dentro do Anniversaire Picasso 2023, que conmemorarán conxuntamente España e Francia nos seus museos e cidades picassianas. Este novo proxecto expositivo estará comisariado por Antón Castro, Malén Gual e Rubén Ventureira e conta coa coordinación xeral de Ángeles Penas, diretora do Museo de Belas Artes da Coruña, e coa participación do equipo técnico-facultativo do museo.
Foto: Wikipedia
Galicia vén de pechar o mes de xullo máis cálido desde 1961, ano a partir do que se dispón na Comunidade de rexistros climatolóxicos. Esta é a principal conclusión do informe mensual elaborado por MeteoGalicia e que presentou esta mañá en Santiago a directora xeral de Enerxías Renovables e Cambio Climático, Paula Uría. Tal e como explicou, o valor medio da temperatura máxima se situou en 29 graos, cunha anomalía positiva de 3,5 graos en comparación cos rexistros das estacións meteorolóxicas máis representativas da Comunidade. Ademais, no caso da temperatura media o dato situouse en 22,5 graos, 2,8 graos por riba do valor normal climatolóxico para este mes.
O Diario Oficial de Galicia publicou a orde pola que se actualiza a relación de deportistas de alto nivel, alto rendemento, rendemento deportivo de base e vitalicias, así como persoas adestradoras ou técnicas, xuízas e árbitras recoñecidas de alto nivel. Esta actualización súmase ás realizadas en xuño e establece un novo récord de persoas recoñecidas, que ascenden a 1.941, das que 835 son mulleres (43%) e 1.106 homes (57%). Arredor do 76 % das persoas -1.466- son deportistas galegos de alto nivel (623 mulleres e 843 homes). Ademais, figuran 201 deportistas de alto rendemento (101 mulleres e 100 homes), 183 deportistas de rendemento deportivo de base (86 mulleres e 97 homes), 47 persoas técnicas de alto nivel (catro mulleres e 43 homes), 29 persoas árbitras e xuízas (16 mulleres e 13 homes) e 15 deportistas galegos de alto nivel vitalicios.
