jueves, 11 de junio de 2026
A directora xeral de Formación e Colocación, Zeltia Lado, visitou hoxe a mesa sectorial sobre turismo, hostalaría e comercio -reunida no Centro de Novas Tecnoloxías de Santiago-, unha das nove que están a axudar a definir as necesidades formativas do mercado laboral galego e a configurar a Axenda Galega de Capacidades, que situará á comunidade á vangarda europea da formación para o emprego.
A Xunta completou hoxe as xuntanzas presenciais das mesas de traballo nas que axentes sociais e representantes das diferentes sectores están a perfilar as necesidades formativas para cada un deles. Tras os encontros, a Axenda de Capacidades entrará nunha nova fase na que se espera completar o seu deseño antes do verán.
As dinámicas de traballo centráronse en sectores estratéxicos e con grandes potencialidades de desenvolvemento, entre outros: a pesca o naval, as enerxías renovables mariñas, o metal ou, como é o caso da xuntanza visitada por Lado, o turismo hostalaría e comercio.
Participaron nestas mesas, asociacións sectoriais e clústeres, sindicatos, asociacións de empresarios, autónomos e empresas de economía social, centros de coñecemento, e a Asociación Galega de Empresas de Formación.
Tras estas dinámicas, a Xunta obterá unha primeira visión da Axenda que permitirá deseñar os contidos e módulos formativos que mellor se axusten ás necesidades do mercado laboral galego.
O obxectivo destes encontros técnicos é conseguir afondar nas necesidades de capacitación existentes e contrastar a súa cobertura dentro das capacidades formativas do sistema de formación para o emprego actual. Este traballo constitúe un paso previo para que cada sector comece a elaborar as súas conclusións e as poida incorporar á Axenda.
A Axenda Galega de Capacidades para o Emprego constitúe un gran pacto social que permitirá adaptar a capacitación profesional da forza laboral galega ás necesidades do mercado de traballo. Este instrumento, da man do Estudo de Tecnoloxías Emerxentes que vén de rematar a Consellería de Emprego e Igualdade, está a permitir detectar as carencias formativas de traballadores e traballadoras da comunidade, para avanzar no deseño de actuacións con maior encaixe no actual contexto.
Con este instrumento, o Goberno galego pretende cimentar un mercado laboral forte e competitivo, no que todas as persoas teñan cabida e que dea as empresas un futuro prometedor e próspero. Para iso é preciso que Administración, tecido empresarial e asociativo e o ámbito formativo traballen xuntos en iniciativas como a Axenda Galega de Capacidades; unha medida pioneira que situará a Galicia á vangarda de España e permita adaptar as directrices europeas de capacitación á realidade galega económica e social.
Tivo lugar a xornada 'Deputados por un día', na que os escolares galegos levaron ao hemiciclo as súas propostas para mellorar a sociedade. Os catro representantes dos colexios, un por provincia, compartiron na Cámara as súas reflexións sobre a convivencia, o tema arredor do que xira este curso o programa educativo Abraza tus valores, e a relación dos menores coas tecnoloxías. Participaron máis de 8.300 escolares de entre 4 e 12 anos de 83 centros públicos, concertados e privados de Galicia (Arquitecto Casas Novoa de Santiago, o CEIP Plurilingüe A Gándara, de Monforte de Lemos, o CEIP Plurilingüe Irmáns Villar, de Ourense e o CEIP Plurilingüe de Cerdeiriñas, de Piloño).
A actividade levada a cabo pola Axencia de Protección da Legalidade Urbanística (APLU) para protexer o medio ambiente e o patrimonio natural e paisaxístico galego permitiu o pasado ano a reposición da legalidade en 121 actuacións en toda Galicia. Estas reposicións foron resultado do labor do equipo inspector do organismo adscrito á Consellería de Vivenda e Planificación de Infraestruturas, e repartíronse principalmente na provincia de Pontevedra, con 60 actuacións, seguida da Coruña con 30, Lugo con 21 e Ourense con 10.
