miércoles, 15 de julio de 2026
O director da Axencia Galega das Industrias Culturais da Xunta de Galicia, Jacobo Sutil, acompañou hoxe a organización da Mostra de Cinema Periférico (S8) na presentación da súa 13ª edición, que terá lugar do 27 de maio ao 5 de xuño en diferentes localizacións da cidade da Coruña. O evento, consolidado xa como unha das citas de referencia arredor do cinema experimental, volve atoparse entre a listaxe de certames subvencionados pola Consellería de Cultura, Educación e Universidade a través da súa liña de axudas para festivais audiovisuais, que este ano distribúe 210.000 euros entre 11 citas.
En concreto, como sinalou Sutil, o encontro coruñés resultou adxudicatario de 40.000 euros, a maior das contías concedidas nesta convocatoria, mediante a que o Goberno galego mantén o seu compromiso cunha serie de eventos estratéxicos para o sector, que conforman unha moi rica oferta en canto a temáticas, xéneros e especializacións e que nas súas últimas edicións acreditaron unha solidez a proba das maiores dificultades e imprevistos, afirmou.
Para o responsable de Industrias Culturais da Xunta, o (S8) combina de xeito maxistral unha ollada aberta aos últimos e máis interesante da vangarda internacional co seu papel como altofalante para os profesionais galegos máis interesados na experimentación con distintos xéneros e formatos.
Máis de 50 estreas internacionais
Esta 13ª edición ten prevista a proxección de 138 pezas procedentes de 14 países, das que 53 son estreas internacionais e 47 poderán verse por vez primeira en España. O programa tamén inclúe presentacións, live performance, talleres e encontros profesionais coa participación de 53 artistas convidados, ademais de diferentes actividades para o alumnado de sete centros de ensino da Cidade.
A presencialidade e a experiencia colectiva recuperan o seu protagonismo este ano, no que haberá unha importante representación do cinema experimental realizado por mulleres. Recibirase, así mesmo, a visita de destacados artistas internacionais, como Lee Ranaldo, cofundador da mítica banda estadounidense Sonic Youth, e a escritora e artista visual canadense Leah Singer, que estarán na Coruña presentando algúns dos traballos que veñen asinando xuntos desde 1991 e a súa performance Contre Jour.
A organización adiantou tamén que os australianos Dianna Barrie e Richard Tuohy, dúas das máximas referencias internacionais do cinema fotoquímico, impartirán un taller intensivo sobre como facer cinema en 16 mm de maneira autosuficiente. As inscricións xa están abertas na web do festival.
Escaparate do cinema galego
O director da Agadic fixo tamén fincapé na función da mostra (S8) como escaparate do máis innovador que se está a facer en Galicia dentro do ámbito audiovisual. Este ano, por exemplo, contarase con case unha vintena de creadores galegos nas diferentes seccións, que se irán desvelando proximamente, e porase o foco especialmente nas novas xeracións, cuestionando e rompendo os parámetros do cinema experimental ou de vangarda orixinal
Referiuse, en concreto, á rexuvenecida sección SINAIS, cunha escolma de pezas galegas do último ano, e á produción Ultreia et Suseia, levada a cabo ao abeiro do Fondo de Proxectos Culturais Xacobeo 21-22 e que será ofrecida en liña polo festival. Este traballo está composto por entrevistas en exclusiva que o (S8) lles fixo a cineastas como Carla Andrade, Diana Toucedo, Helena Girón e Samuel Delgado, Xisela Franco, Tono Mejuto, Xiana do Teixeiro, Alexandre Cancelo e Berio Molina, e pensado para a súa promoción internacional, con subtítulos en galego, castelán e inglés.
O ciclo de concertos gratuítos Atardecer no Gaiás estará dedicado esta semana a dúas bandas do novo tradi galego, Maricarme e Unto Vello. Ambas as dúas propostas recollen melodías do folclore que actualizan sen perder a súa esencia a partir de novos arranxos e instrumentación contemporánea. Os concertos serán o xoves 16 e venres 17 a partir das 21,00 horas na Praza central da Cidade da Cultura. Maricarme presentará o xoves 16 de xullo en Atardecer no Gaiás un adianto do que será o seu primeiro EP, con temas como Eu non quero té, nos que mesturan violíns, pandeiros, bouzouki e electrónica nun son fresco e actual que transita entre a tradición oral e as composicións propias. Este supertrío nace da unión de tres artistas cunha recoñecida traxectoria na escena: Cibran Seixo (Davide Salvado, Abraham Cupeiro), María Jorge (Caldo, Mercedes Peón) e Migui Carballido (Zeltia Irevire, Mäi) e o seu directo escoitouse xa no Festival Maré, Festiletras ou na Foliada da Fonsagrada.
O Plan de prevención e defensa contra os incendios forestais de Galicia (Pladiga 2026) afronta a súa vindeira campaña coa maior dotación económica da súa historia, alcanzando un total de 213 millóns de euros (un 18 % máis que o ano anterior). Non obstante, alén do esforzo orzamentario en persoal e infraestruturas, o deseño estratéxico para este ano destaca pola integración de tecnoloxía de vangarda e ferramentas de participación cidadá dirixidas a optimizar a detección temperá e a capacidade de resposta operativa no monte.
