viernes, 30 de octubre de 2026
Así, trasladou que a Consellería do Medio Rural está elaborando -en conxunto coas autoridades portuguesas- un plan que abarca a identificación dos riscos existentes na zona de influencia (Galicia, norte de Portugal, Castela e León e Estremadura) e os medios para atallalos.
Deste xeito, o director xeral puxo en valor o proxecto Interlumes, que comprende a creación da primeira base de avións fronteiriza e reforza e mellora outras instalacións para a prevención e extinción de lumes. Así, aumentarase a capacidade operativa de resposta ao incrementar os medios dispoñibles, á vez que se aposta por un servizo cunha formación especializada para unha correcta xestión conxunta.
Durante a videoxornada, o director xeral debullou os principais obxectivos deste proxecto, que pasan -ademais de pola posta en marcha da base e pola elaboración do devandito protocolo- por reforzar e mellorar os medios materiais que os distintos socios do proxecto poidan empregar na extinción de incendios, así como por intensificar o uso de novas tecnoloxías TIC´s aplicadas á rede de vixilancia e seguridade forestal. Ademais, tamén se contemplará a posta en marcha de actividades de sensibilización da poboación da área nesta materia, xa que todos estamos involucrados na prevención de incendios forestais, puntualizou Manuel Rodríguez.
Neste senso, o director xeral tamén compartiu a experiencia vivida durante os incendios de 2017, onde persoal do Servizo de prevención e extinción de incendios forestais da Xunta se trasladou ao país veciño para colaborar na extinción dos lumes. Así, Rodríguez asegurou que unha boa coordinación pasa polo coñecemento mutuo das tácticas e técnicas a empregar ante situacións adversas, polo que é vital unha formación especializada e baixo un mando único.
Base fronteiriza
O proxecto Interlumes está cofinanciado co fondos Interreg e conta cunha dotación total de 9,1 millóns de euros, que permitirá poñer en marcha a primeira base aérea fronteiriza entre España e Portugal, que se situará entre as localidades ourensás de Verín e Oímbra.
A futura base aérea caracterizarase pola súa adecuación a aeronaves especializadas en extinción, tanto avións de carga en terra como helicópteros e, incluso, avións anfibios, polo que estará dotada con distintos tipos de depósitos de carga en terra.
A base, con categoría 2 de aeródromo, contará cunha superficie de 23 hectáreas e estará dotada dunha pista de 1.200 metros de lonxitude e 30 metros de ancho, con 15 metros a cada lado de superficie acondicionada. En cada extremo da plataforma de rodadura instalaranse balizas luminosas e haberá un hangar con capacidade para seis avionetas de carga en terra.
Así mesmo, ademais dunha construción duns 300 m² con estancias individuais para a tripulación, a base estará dotada de tanques de combustible cunha capacidade mínima de 40.000 litros. Tamén contará cunha motobomba para un caudal mínimo superior a 350 lts/min. Ademais, haberá equipos de extinción compostos por tres depósitos de auga e unha rede de hidrantes (bocas de incendio), así como unha nave auxiliar para vehículos pesados e lixeiros.
O XXXVI Festival de Jazz de Lugo ofrecerá do 4 ao 14 de novembro un total de 22 actuacións que combinarán grandes figuras internacionais cunha ampla presenza de músicos galegos en catro escenarios. Conforme ao programa, o Auditorio Fuxan os Ventos acollerá a apertura o mércores 4 co trío do saxofonista e clarinetista cubano Paquito DRivera. Neste mesmo escenario actuarán Abe Rábade, o día 8, e Kenny Barron Trio, o 11. No Círculo das Artes sucederanse James Carter Organ Trio, o 5 de novembro; Jogo de Damas, o día 6; Takuya Kuroda Quintet, o 7; Patricia Brennan Septet, o día 12; Erik Truffaz & Antonio Lizana, o día 13, e Clarence Bekker Band, o 14 de novembro.
O informe da Dirección Xeral de Saúde Pública da Consellería de Sanidade sobre a actividade das infeccións respiratorias agudas referido á semana que rematou o 25 de outubro reflicte que a actividade gripal na comunidade mantén o seu nivel basal con tendencia crecente, constatando un incremento na dispensación de antigripais nas farmacias galegas. En concreto, a taxa de dispensación de antigripais nas farmacias aumentou un 38,9 % na última semana, mentres que a de probas de antíxenos se reduciu nun 17,9 %, tal e como informan as oficinas de farmacia integradas na rede sentinela impulsada pola Xunta, co obxectivo de anticipar a evolución dos virus respiratorios na comunidade.
