jueves, 18 de junio de 2026
Tal e como se acordou nas distintas reunións mantidas entre os representantes das diferentes Administracións, os datos vanse actualizando conforme os distintos axentes amplían o número de recursos e prazas ofertadas. Os centros postos a disposición pola Administración autonómica son as Residencias de Tempo Libre de Panxón e o Carballiño, o Centro de Formación e Experimentación Pedro Murias de Ribadeo, o albergue xuvenil de Portomarín, as Casas do Mar de Burela, Celeiro-Viveiro e A Coruña, o Centro de acollida para vítimas de violencia de xénero de Vigo, e os centros residenciais docentes da Coruña, Ourense e Vigo.
Estas prazas súmanse ás 432 camas en hospitais nas sete áreas sanitarias para acoller aquela poboación de Ucraína con necesidades de atención sanitaria. Delas, 113 serán para pacientes pediátricos, 15 para nenas e nenos con necesidades de tratamento oncolóxico e o mesmo número para neonatos. Con respecto aos adultos, das 319 prazas dispoñibles para eles, un total de 25 serían para pacientes oncolóxicos en tratamento.
Coordinación a nivel nacional
Para canalizar as mostras de solidariedade do tecido social galego, o presidente da Xunta, Alberto Núñez Feijóo, solicitou por carta este luns ao presidente do Goberno central que se aprobe un Plan nacional de acollida para persoas refuxiadas, en coordinación coas comunidades autónomas, para ordenar e canalizar axeitadamente, por vías oficiais, a boa vontade que están a demostrar os españois.
Feijóo solicitou que este asunto se aborde na Conferencia de Presidentes que se celebrará este domingo na Palma, así como unha cuestión que preocupa á sociedade española como é a crise enerxética, a ruptura da cadea de subministros ou a elevada inflación que ameaza a recuperación económica, situacións que se están vendo agravadas por mor da guerra.
Acción humanitaria
Así mesmo, a Xunta fará unha convocatoria pública de acción humanitaria por valor de 400.000 euros para canalizar a axuda a Ucraína a través das entidades sociais galegas e farase un inventario, a través da Fegamp, dos lugares de referencia de recollida e almacenaxe de material para ter coñecemento do seu volume e contido. O Goberno galego acordou cos concellos galegos e coas entidades sociais darlle prioridade ás doazóns en efectivo fronte as axudas en especia polos problemas de loxística.
A Mostra Internacional de Teatro de Ribadavia reunirá do 17 ao 25 de xullo 25 espectáculos procedentes de Galicia, Portugal, Francia, México e diferentes comunidades autónomas, nunha 42ª edición atravesada pola creación contemporánea, a diversidade de linguaxes e formatos, a memoria histórica, a música en directo e a capacidade da escena para activar pensamento crítico e experiencia colectiva. Entre estas propostas figura A Fortaleza, da compañía A Feroz, coproducida polo Centro Dramático Galego e o festival FITEI do Porto. A obra, dirixida pola portuguesa Raquel Sousa e con dramaturxia de Lorena Conde e da propia Sousa, recupera a memoria das guerrilleiras antifranquistas galegas a través da figura de Consuelo Rodríguez López, Chelo.
O Festival de Música Antiga e Barroca Ateneo Barroco celebrará do 6 ao 20 de outubro a súa oitava edición cun programa articulado arredor da música antiga, os instrumentos históricos, a divulgación e o encontro co público. O certame compostelá ofrecerá seis concertos en diferentes espazos da capital de Galicia, ademais de cinema documental, unha conferencia, unha acción de improvisación, un club de lectura e varios encontros cos artistas. A programación principal de Ateneo Barroco desenvolverase en espazos como a Igrexa da Universidade, o Teatro Principal, o Salón Teatro e o Paraninfo da Universidade. O calendario de recitais abrirase con Lina Tur Bonet e Bach, partita, sonata, e continuará con Ars Atlántica, Resonet, Arc & Volta e Bertrand Cuiller, antes do peche con Accademia del Piacere e Fahmi Alqhai en In dulci jubilo.
