sábado, 31 de octubre de 2026
Nacido en 1905, Mikio Naruse é un dos grandes autores cinematográficos a nivel mundial, cunha obra á altura de nomes tan coñecidos como Ozu, Kurosawa ou MIzoguchi. As súas películas están marcadas por amores cheos de complexidade e retratos de mulleres de personalidade forte que se confrontan cos límites sociais.
Apertura con Madre
A retrospectiva Esenciais: Mikio Naruse ábrese o día 2 ás 17,00 horas coa película Madre. Inspirada nunha colección de ensaios de estudantes de Primaria sobre as súas nais, debuxa un retrato episódico e realista da nai xaponesa media e da súa loita cotiá durante a posguerra. Nesa mesma data, ás 19,30 h., exhibirase La voz de la montaña, un dos filmes favoritos do seu autor. O venres será a quenda de El almuerzo, na que destaca a sutil interpretación de Setsuko Hara, e de Crisantemos tardíos, baseada na novela de Fumiko Hayashi.
Xa a vindeira semana, o luns 7 haberá unha única sesión ás 17,00 h. con El sueño de cada noche, a máis famosa das películas mudas de Naruse. O martes 8 recupérase a dobre sesión con Nubes flotantes, baseada na novela homónima de Fumiko Hayashi e considerada a mellor obra de Naruse e unha das máis destacadas da historia do cine. Seguiralle na mesma xornada A la deriva, retrato das reviravoltas dunha casa de gueixas baseado nunha novela de Aya Koda e que reúne algunhas das grandes actrices xaponesas da época.
O ciclo continúa o luns 14 con Tormento, na que Naruse altera a estrutura moral convencional ao introducir o amor entre nora e cuñado, e Nubes de verano, centrada nos cambios drásticos que aconteceron no Xapón rural da posguerra a causa da reforma agraria e do crecemento económico. O peche, o martes 15, póñeno con Cuando una mujer sube una escalera, unha das mellores películas de Naruse, cunha sobriedade que agocha só en parte a súa crueza, e Nubes dispersas, na que aborda unha das formulacións esenciais do seu cine, a das barreiras insalvables coas que se encontra unha parella de amantes.
O XXXVI Festival de Jazz de Lugo ofrecerá do 4 ao 14 de novembro un total de 22 actuacións que combinarán grandes figuras internacionais cunha ampla presenza de músicos galegos en catro escenarios. Conforme ao programa, o Auditorio Fuxan os Ventos acollerá a apertura o mércores 4 co trío do saxofonista e clarinetista cubano Paquito DRivera. Neste mesmo escenario actuarán Abe Rábade, o día 8, e Kenny Barron Trio, o 11. No Círculo das Artes sucederanse James Carter Organ Trio, o 5 de novembro; Jogo de Damas, o día 6; Takuya Kuroda Quintet, o 7; Patricia Brennan Septet, o día 12; Erik Truffaz & Antonio Lizana, o día 13, e Clarence Bekker Band, o 14 de novembro.
O informe da Dirección Xeral de Saúde Pública da Consellería de Sanidade sobre a actividade das infeccións respiratorias agudas referido á semana que rematou o 25 de outubro reflicte que a actividade gripal na comunidade mantén o seu nivel basal con tendencia crecente, constatando un incremento na dispensación de antigripais nas farmacias galegas. En concreto, a taxa de dispensación de antigripais nas farmacias aumentou un 38,9 % na última semana, mentres que a de probas de antíxenos se reduciu nun 17,9 %, tal e como informan as oficinas de farmacia integradas na rede sentinela impulsada pola Xunta, co obxectivo de anticipar a evolución dos virus respiratorios na comunidade.
