domingo, 11 de octubre de 2026
Ata o momento desprazouse a gozar do espectáculo veciñanza de Gondomar, Vilagarcía de Arousa e Boiro, así como alumnado do instituto IES Audiovisual de Vigo. Este venres chega público procedente de Ribeira e de Malpica de Bergantiños, e o sábado, de Rianxo e Mos. A vindeira semana será a quenda de Vedra e Culleredo, o día 25, e de Ares e Mesía, o 26.
Para a primeira fin de semana de marzo prevese o desprazamento de alumnado do instituto IES Ramón Cabanillas de Cambados e de veciñanza de Sada, o venres, e de Santiso e Outes, o sábado. O Centro Sociocomunitario de Ferrol achegarase ao Salón Teatro o mércores 9. Xa por último, na xornada do 11 o autobús do CDG viaxará desde Oleiros, e na do 12, desde Carral e Cee.
Con esta iniciativa, o CDG quere facilitar o achegamento da cidadanía galega ao teatro ao tempo que promove a creación de público para un espazo de exhibición de referencia en Compostela como é o Salón Teatro. As persoas participantes benefícianse dun desconto do 40% no prezo da entrada, coa viaxe en autobús incluída.
Funcións de mércores a domingo
Estreada en xaneiro, A peste ofrece funcións todas as semanas de mércores a domingo. Os mércores, ás 18,00 h., desenvólvese a sesión descontraída, adaptada ao público con dificultades para permanecer moito tempo sen moverse e con pouca tolerancia á escuridade e ao ruído. Os xoves, venres e sábados as representacións teñen lugar ás 20,00 h. e por último, os domingos, ás 18,00 h. As entradas poden adquirirse a través de ataquilla.com e no despacho de billetes desde dúas horas antes do inicio. O prezo é de 10 euros de xoves a sábado, con descontos do 40% para diversos colectivos, e de 6 euros os mércores e os domingos.
Constitúen o elenco 15 intérpretes de ampla traxectoria, como Nacho Castaño, quen asume o papel protagonista, Evaristo Calvo, César Cambeiro, Xurxo Cortázar, Salvador del Río, Casilda G. Alfaro, Paku Granxa, Luís Iglesia B., Miquel Ínsua, Tone Martínez, Rebeca Montero, Marcos Orsi, María Roja, Santi Romay e Carlos Sante. Xunto a eles, fan posible o espectáculo Dani Trillo na escenografía, Guillerme Fernández na música e no espazo sonoro, Martina Cambeiro no vestiario e maquillaxe, Afonso Castro na iluminación, Belén Pichel na asistencia de dirección, e Keka Losada na asistencia de produción.
A peza ofrece unha reflexión sobre o comportamento da sociedade e dos individuos durante situacións de crise. A través do personaxe do doutor Rieux, a historia narra os sucesos na cidade de Orán durante unha praga de peste que a asedia e pon os seus habitantes en corentena. Céntrase nos periplos das persoas encerradas, en como loitan contra a praga e lle buscan un sentido á súa situación, primeiro nunha loita egoísta pola supervivencia, logo a través do esforzo colectivo e comunitario.
Foi presentada a novena edición de Intersección, Festival Internacional de Cine da Coruña, celebrada nos Cantones Cines. O festival desenvolverase do 13 ao 17 de outubro cunha programación que combina proxeccións, exposicións, formación e encontros profesionais arredor das novas linguaxes cinematográficas. Así, as seccións competitivas Galicia, Internacional e Fulgor achegarán ao público obras afastadas dos circuítos comerciais habituais e novas voces da creación audiovisual contemporánea. En concreto, a sección Internacional reúne 27 filmes procedentes de 22 países, entre os que figuran catro estreas mundiais, 17 en España e cinco en Galicia. As propostas exploran cuestións como a tecnoloxía, a memoria, o territorio e a identidade desde linguaxes e xeografías diversas.
A Real Academia Galega de Ciencias (RAGC) celebrou en Santiago, no Salón Nobre do Colexio de Fonseca, o acto do Día da Ciencia en Galicia, no que se homenaxeou á oceanógrafa Aida Fernández Ríos (Vigo, 1947 - Moaña, 2015) como Científica Galega 2026. Ademais, entregáronse as Medallas de Investigación a cinco científicas e científicos da nosa comunidade. O presidente da Academia destacou que 'Aida Fernández Ríos foi unha investigadora capaz de identificar problemas relevantes e de situalos nun contexto internacional, converténdose nunha científica respectada moito máis alá de Galicia.
