jueves, 15 de enero de 2026
O Centro Galego de Arte Contemporánea (CGAC) retoma o programa expositivo de apoio a artistas de Galicia de media carreira, iniciado en 2016 e que se viu interrompido nos dous últimos anos por mor da pandemia, coa mostra Suso Fandiño. Wunderkammer. Así o destacou o secretario xeral de Cultura, Anxo M. Lorenzo, na rolda de prensa de presentación da exposición que poderá visitarse ata o 15 de maio. No acto participaron tamén o artista, a comisaria Mónica Maneiro e o director do CGAC, Santiago Olmo.
A mostra presenta obras recentes e tres grandes instalacións producidas especificamente para o espazo arquitectónico do CGAC. Segundo sinalou o representante da Consellería de Cultura, Educación e Universidade, con ela o artista propón unha serie de vías e ligazóns pouco habituais, debuxando un espazo museístico onde as obras conectan entre si creando relacións punzantes. Trátase ante todo de activar no público a necesidade de buscar significados ocultos, engadiu.
Deste xeito, Fandiño transforma o museo nun espazo de xogo que lle permite reflexionar sobre o social a partir da descontextualización e a reorganización dos produtos da sociedade de consumo e faino partindo da visión das cámaras de marabillas (wunderkammers, en alemán) como espazos cambiantes.
O secretario xeral de Cultura referiuse tamén á dimensión política do traballo, baseada na interrogación do espectador. A idea do uso político da arte, que subxace en toda a exposición, magnifícase no pavillón errante, a grande instalación coa que o artista invade o dobre espazo do CGAC e recrea os mastros da fachada do Pavillón da República Española na Exposición Universal de París de 1937, apuntou.
Na data da apertura da exposición, mañá venres, haberá unha presentación aberta ao público por parte do artista, a comisaria e o director do CGAC. O acto terá lugar ás 18,30 no auditorio do espazo compostelán.
Creador clave na arte galega
Cunha traxectoria desenvolvida a través da mestura de elementos pictóricos, fotografía, vídeo e a instalación, Fandiño é un dos creadores clave no contexto da arte contemporánea en Galicia nas últimas décadas. Neste sentido, Anxo M. Lorenzo incidiu na relevancia desta primeira mostra individual do compostelán no CGAC, así como do programa de apoio a artistas de media carreira no que se enmarca, iniciado en 2016 con Berta Caccamo e que tivo tamén como protagonistas a Álvaro Negro, Nicolás Combarro e Loreto Martínez Troncoso.
Nacido en Compostela, Suso Fandiño é doutor en Belas Artes pola Universidade de Vigo e licenciado en Historia da Arte pola Universidade de Santiago de Compostela. Actualmente traballa como docente na Facultade de Belas Artes de Pontevedra e no ensino secundario, ademais de impartir cursos conferencias. A súa obra foi exposta en diversos espazos nacionais e internacionais, así como en feiras de arte, e forma parte de importantes coleccións públicas e privadas, como a Colección CGAC. A súa serie sobre o conflito sirio recibiu en 2016 o máximo galardón no Premio Internacional de Gráfica Máximo Ramos.
O virus respiratorio sincitial (VRS) continúa a aumentar a súa taxa de positividade e superou o 8 % na semana 2 do ano (do 5 ao 11 de xaneiro), segundo se recolle no informe semanal de seguimento deste virus que publica a Consellería de Sanidade. Nesta última semana, obsérvase un descenso na taxa de consultas en atención primaria por bronquiolite en menores de dous anos, en concreto, diminuíu nun 18,2 % con respecto á semana previa. En canto a hospitalizacións, rexistráronse dous ingresos na última semana na cohorte de nados entre abril e setembro de 2025 e unha hospitalización dun lactante menor de dous meses, que están a pasar a súa primeira onda do VRS.
O Diario Oficial de Galicia vén de publicar a orde do 30 de decembro de 2025 pola que se recoñecen as persoas deportistas de alto nivel, alto rendemento, rendemento deportivo de base e vitalicias, as persoas adestradoras ou técnicas, xuízas e árbitras recoñecidas de alto nivel, e se relacionan as solicitudes desestimadas e a súa causa. Con estas novas 158 incorporacións, o número total de deportistas galegos e galegas recoñecidos e recoñecidas segue batendo récords e chega xa a 1.773, sendo 740 mulleres (42%) e 1.033 homes (58%). Entre os deportistas recoñecidos destacan o loitador José Cuba, 20 veces campión de España; o xogador de balonmán David Faílde, subcampión do Mundo sub19; as padexeiras Estefanía Fernández e Lucía Val, campioas do Mundo no K4 500 ou o golfista Ignacio Mateo, clasificado para o Open de España.
