sábado, 8 de agosto de 2026
A Xunta inicia hoxe o contacto con máis de 300 expertos de distintos eidos profesionais para presentar as principais liñas do Plan Estratéxico de Galicia (PEG) 2021-2030 de xeito telemático. Trátase de recoñecidos expertos do eido social, académico, empresarial e asociativo que participan hoxe e mañá en sesións de traballo divididas en dúas partes.
Na parte común, ás 10,00h farase a presentación do borrador do PEG 2021-2030 cos seus obxectivos xerais, estrutura e metas principais. A partir das 10,30h, e de xeito simultáneo, terán lugar dúas sesións específicas cada día, nas que a través de relatorios de destacados xestores de distintos departamentos da Xunta se analizarán os obxectivos estratéxicos dos eixes nos que se estrutura o plan.
Así, hoxe luns, abordarase o Eixe 1: reto demográfico, no que se falará de temas como Emprego de calidade, Atención ao benestar, Vivenda accesible e Protección da saúde. En torno ao Eixe 2: Galicia verde e sostible os relatorios centraranse nos temas Fomento dunha economía baixa en carbono, Cambio climático, Mobilidade sostible e infraestruturas e Patrimonio natural.
As xornadas de presentación dos obxectivos estratéxicos do Plan continuarán mañá martes no mesmo horario e tamén de xeito telemático. Nesta segunda e última xornada, despois da presentación, os expertos do Eixe 3: Competitividade e Crecemento analizarán asuntos de importancia crucial neste ámbito, como I+D+i, Sociedade dixital, Fomento do emprendemento e investimento, Turismo e Sector agrogandeiro, forestal e do mar. No Eixe 4: Cohesión social e territorial, os temas sobre os que se debaterá son Educación inclusiva e de calidade, Igualdade e inclusión social, Cultura e Cohesión territorial.
O novo Plan
O Plan Estratéxico de Galicia 2021-2030 terá como prioridades acadar unha recuperación sostible, resistente e inclusiva; deseñar a Galicia do futuro poñendo no centro o reto demográfico; acadar unha Galicia máis sostible e climaticamente neutra; promover unha sociedade innovadora, moderna, competitiva, solidaria e cohesionada; favorecer os valores diferenciais de Galicia como motores de desenvolvemento; e garantir unha senda previsible, rigorosa e estable de actuación do Goberno galego a medio prazo.
En definitiva, o novo Plan pretende definir os obxectivos estratéxicos coa finalidade de converter a Galicia nunha rexión máis verde, máis dixital e mellor adaptada aos retos actuais e futuros, que converxa en riqueza coa media española e europea, logrando unha recuperación sostible, resistente e inclusiva.
Galicia é a comunidade autónoma de referencia en vencellar a acción de Goberno á planificación estratéxica. De feito, foi pioneira na aprobación dun plan estratéxico de carácter global, e este será o terceiro plan que aproba a Comunidade Autónoma despois dos xa aprobados para os períodos 2010-2014 e 2015-2020.
A loita contra os incendios forestais suma un novo aliado tecnolóxico ao servizo de toda a sociedade. A aplicación móbil ALume, deseñada para facilitar que calquera persoa poida dar a alarma sobre un foco de lume de forma inmediata e precisa, xa se atopa plenamente operativa e dispoñible para a súa descarga de balde nas plataformas Android e iOS. O obxectivo principal desta ferramenta é potenciar a detección temperá dos incendios forestais. Nunha emerxencia no monte, os primeiros minutos son decisivos para evitar que un foco inicial se converta nun gran incendio; por iso, ALume nace para acurtar os tempos de aviso e facilitar ao servizo de extinción datos exactos antes de despregar os medios sobre o terreo. Cabe sinalar que a aplicación leva xa 7.000 descargas e 200 notificacións que axudaron ao operativo.
Un dos grandes atractivos desta undécima edición será a estrea de dez novos espectáculos, todos eles impulsados por compañías galegas, un dato que evidencia o dinamismo creativo do sector dos monicreques na Comunidade. A programación abrirase coa nova versión de A festa dos títeres, presentada por Viravolta, Vai de Roda e Títeres Alakrán, para continuar coa estrea de Treco-lerias, de Trécola Producións, e A rosa de papel, adaptación ao teatro de monicreques do texto de Valle-Inclán realizada por Alakrán.
